Kryetari i Grupit Parlamentar të Partisë Socialiste, Taulant Balla është rikthyer në vendlindjen e tij ku dhe është takuar dhe ka shtrënguar duart me dhjetëra qytetarë.
Socialisti ka marrë pjesë në Festën e Mjaltit, një festë kjo e cila prej vitesh është rikthyer në një traditë në këtë zonë.
Të shumtë ishin ata qytetarë të cilët kishin ngritur tezgat e tyre dhe promovonin mjaltin dhe prodhimet bujqësore të zonës. Gjatë fjalës së tij, Balla, i cili shoqërohej po ashtu dhe nga ministri i Bujqësisë dhe Zhvillimit Rural, Andis Salla, theksoi rëndësinë që kjo zonë ka për prodhimin cilësor të mjaltit dhe zhvillimin e turizmit malor.
“Librazhdi është një prej prodhuesve më të mëdhenj të mjaltit në Shqipëri, me shumë cilësi me shumë varietete, duke përfshirë këtu dhe varietete i themi të rralla për shkak të kullotës, siç është pjesa që lidhet me mjaltin e zonës së Gurakuqit, mjalti i gështenjës apo dhe plot shumëllojshmëri të tjera”, theksoi Balla, ndërkohë që ditën e sotme ka publikuar një video në rrjetet e tij sociale ku dhe ka shkëputur momente nga takimi i tij me qytetarët.
