Qeveria ka firmosur shkarkimin e Erion Veliajt nga pozicioni i kryebashkiakut të Tiranës, duke finalizuar urdhrin e kryministrt në Asamblenë e PS. Ky vendim vjen pas një periudhe të gjatë qëndrimi të Veliajt në paraburgim, duke i hapur rrugën zgjedhjeve të parakohshme për Bashkinë e kryeqytetit.
Më 23 shtator, pas këresës së Ramës, Këshilli Bashkiak i Tiranës votoi në favor të shkarkimit të Veliajt, duke iu referuar nenit 62 të ligjit “Për vetëqeverisjen vendore”. Ky nen bën të mundur shkarkimin e një kryebashkiaku nëse ai mungon në detyrë për më shumë se tre muaj. Meqenëse Veliaj ndodhet në paraburgim që nga 10 shkurti 2025, kjo masë ligjore u zbatua.
Gjatë mbledhjes, kërkesa për shkarkim, e mbështetur nga Partia Socialiste, Partia Demokratike dhe Endri Shabani, u bashkua në një të vetme dhe u miratua nga Këshilli Bashkiak. Një pjesë e këshilltarëve socialistë dhe opozitarë nuk morën pjesë në votim. Gjatë kësaj kohe, Erion Veliaj pretendoi nga burgu se nuk ishte njoftuar zyrtarisht për mbledhjen, ndërsa zyrtarët e Këshillit Bashkiak thanë se i kishin dhënë mundësinë për t’u mbrojtur me shkrim.
Aktualisht, vendimi i Qeverisë i hap rrugë zyrtarisht zgjedhjeve të reja. Megjithatë, Veliaj ka të drejtë të apelojë vendimin në Gjykatën Kushtetuese brenda 15 ditësh. Nëse ai vendos të ankimojë, atëherë vendimi pezullohet derisa të ketë një vendim përfundimtar nga Gjykata. Në rast se nuk ankimon, atëherë zgjedhjet do të shpallen brenda afatit ligjor.
Partitë politike tashmë janë në përgatitje për fushatë. Kryeministri Edi Rama ka shpallur si kandidate të Partisë Socialiste Ogerta Manastirliun, ndërsa opozita është ende duke u riorganizuar për të dalë me një kandidat të përbashkët. Zgjedhjet në Tiranë pritet të mbahen në të njëjtën ditë me ato në pesë bashki të tjera: Mat, Tepelenë, Dibër, Cërrik dhe Vlorë.
