Qysh kur Ujësjellësin e Fierit e mori në varësi Belinda Balluku, shoqëria korr vetëm humbje. Dokumenti i mëposhtëm tregon se si e çoi kokëposhtë grafikun Mario Bakalli, drejtori i sjellë nga Balluku në Fier, për nevoja elektorale. Zyrtari nga Dibra është pjesë e betejave zgjedhore të Ballukut dhe vazhdimisht shpërblehet me poste për këto shërbime.
Kujtojmë se zëvendëskryeministrja Balluku është shefe e shtabit politik të Qarkut Fier. Menjëherë pas zgjedhjeve ka mbaruar misioni i Mario Bakallit, i cili ka marrë lejen dhe ka mbyllur kontratën me Ujësjellësin. Para se të largohej kishte bërë gati dokumentet e super tenderit 1.1 miliard lekë për shtrirjen e ujësjellësit në një nga zonat e qytetit Fier. Bakallli nuk e “gëzoi” këtë tender, por dosja i kaloi menjëherë drejtorit të ri Klodjan Mema, që u emërua më 16 korrik 2025. Ky i fundit është vendosur në këtë post me ndikimin direkt të deputetit të PS-së, Ceno Klosi.
Tenderi për të cilin po raportojmë është me objekt “Ndërtim rrjet ujësjellësi për zonën DMA 10, Bashkia Fier”. Fondi Limit 110 837 216,00 lekë pa TVSH ishte përllogaritur nga komisionin i caktuar për këtë tender, Pas këtyre përgatitjeve tenderi është shpallur më 19 gusht 2025.
Sipas dokumenteve të dorëzuara në Agjencinë e Prokurimit Publik, tenderi duhej të mbahej më 9 shtator 2025. Pra, banorët e disa lagjeve të Fierit, nga hyrja jugore të qytetit deri në fshatin Mbyet, duhet të gëzoheshin se do të shtrohej një tubacion i ri i ujësjellësit. Por dikush po tallet!
Një ditë para mbajtjes së tenderit, më 8 shtator 2025, drejtori i ri Klodjan Mema ka nxjerrë urdhër për anulimin e procedurës.
U munduam të mësojmë se çfarë arsye të fortë ka pasur Ujësjellësi për të anuluar këtë tender, por gjetëm vetëm një shprehje klishe të thatë që përdoret në rastet kur zyrtarët duan të mbajnë të fshehtë një manipulim.
Drejtor Mema ka konstatuar se “dokumentet e tenderit përmbajnë gabime ose mangësi të rëndësishme”. Pra, tenderi 1.1 miliard lekë qenka bërë me gabime!
Dhe për “gabimet” e drejtorit të Ceno Klosit, sa të mbarojë pazaret zyrtari, banorët duhet të presin pa afat që të nisë ndërtimi i ujësjellësit të ri. Deri atëherë do të kënaqen me njoftime nga Ujësjellësi të tipit “do të ketë reduktim në furnizimin me ujë të pijshëm në qytetin e Fierit”.
Por kush është drejtori që bën gabime në një tender të tillë. Klodjan Memës i ka shkuar emri deri në Kuvend, i akuzuar për thurje intrigash nga një zyrtare Drejtorisë së Përgjithshme të Tatim Taksave.
Ish drejtoresha e mbledhjes së Detyrimeve Tatimore të Papaguara, Shilda Kamberi Hasanaj, e cila ka punuar në Tatime 23 vite i është drejtuar me një ankesë komisionit parlamentar të ligjeve, ku i kërkonte ngritjen e një komisioni hetimor për drejtorin e përgjithshëm të Tatimeve, Ceno Klosin, për abuzimet e kryera nga ky i fundit.
Hasanaj ka dhënë fakte se si Ceno Klodi dhe drejtorët pranë tij i bëjnë presion psikologjik administratës në varësi për të kryer veprime në kundërshtim me ligjin.
Ata që nuk pranojnë, pushohen nga puna, e njëjta gjë ka ndodhur me denoncuesen Shilda Hasanaj, ku sipas saj, ajo refuzuar që të zbatojë urdhrat verbalë e të paligjshëm të drejtorëve të Ceno Klosit.
Hasanaj shpjegon në ankesë se nga drejtori i investigimit të Brendshëm Antikorrupsion, Klodian Mema, i janë dhënë udhëzime se si mund të sulmohej drejtorja e Burimeve Njerëzore në Drejtorinë e Përgjithshme të Tatimeve Vjola Tanto.
Ai i ka paraqitur një letër gjoja anonime, por që në fakt ishte e shkruar në zyrat e administratës tatimore.
Me siguri, Mema ka nisur zanatin e vjetër duke i shërbyer Klosit dhe nuk ka kohë të merret me ujin e qytetarëve. Shpresojmë të jetë një “intrigë” e vogël dhe ky veprim të mos jetë në kuadrin e mashtrimeve elektorale ndaj qytetarëve të Fierit.
/ Gijotina.com /
