Seanca e parë e legjislaturës së re në Kuvend ka nisur me debate dhe tensione, duke krijuar si një ide se si do të jetë edhe qëndrimi i opozitës në seancat e ardhshme. Opozita ka shfaqur që në fillim pankarta me akuza ndaj eksponentëve kryesorë të Partisë Socialiste.
Pas ngritjes së komisionit për verifikimin e mandateve, kreu i PD, Sali Berisha, kërkoi fjalën për procedurë. Fjalimi i tij u ndërpre, ç’ka shkaktoi një debat të ashpër.
“Kryesuesi i seancës nuk lexoi emrat e Bajrit, Pëllumb Gjokës. Nuk i lexoi emrat e deputetëve të vërtetë të partisë së krimit, por vetëm presto nomet,” tha Berisha, ndërsa deputetë të tjerë opozitarë u mblodhën rreth foltores duke mbajtur pankarta.
Drejtuesi i seancës, Vasil Llajo, i kërkoi Berishës dhe deputetëve të tjerë, përfshirë Flamur Nokën dhe Gazment Bardhin, të respektonin rregulloren. Megjithatë, Taulant Balla urdhëroi ndërprerjen e fjalës së Berishës, duke e lënë fjalimin e tij të papërfunduar.
Pas seancës, Berisha mbajti një deklaratë për mediat ku e quajti ngjarjen “skandal” dhe e akuzoi Ramën se po “shkelmon rregulloren e Kuvendit”.
“Ky është një narkoparlament,” tha Berisha. “Ka një rregullore. Asnjë komision nuk ndryshohet pa ndryshuar rregulloren. Po për këtë nuk ka rregullore, nuk ka Kushtetutë. Morali i tij është droga dhe vetëm droga.”
Ai shtoi se Kuvendi i ri po e nis punën si i vjetri, duke diskriminuar opozitën dhe duke i hequr asaj të drejtën për fjalën.
“Si mund ta lija unë Vasil Llajën, një mjek i cili nuk ka asnjë eksperiencë parlamentare dhe e mashtrojnë siç duan. Ai nuk e di që parlamenti është rrëzuar që dje. Që në momentin që ai shpalli komisionet të cilat nuk ekzistojnë në rregullore. Kaq është puna. Ai asgjësoi edhe rregulloren e parlamentit…,” tha Berisha.
Të pranishëm në Kuvend ishin dhe përfaqësues të ambasadave të huaja në vendin tonë dhe të organizatave fetare.
