Prokuroria e Përgjithshme, institucioni që ka për mision hetimin e abuzimeve me fondet publike, akuzohet vetë për një tender të dyshimtë. Bëhet fjalë për një kontratë me vlerë miliona lekë për blerjen e tonerave, e cila, sipas dokumenteve, ngre dyshime serioze për shkelje të procedurave dhe dëmtim të buxhetit të shtetit.
Tenderi me objekt “Blerje materiale për funksionimin e pajisjeve të zyrës (tonera)” u zhvillua nga Zyra e Prokurorit të Përgjithshëm. Kompania fituese është shpallur Marketing & Distribution, në pronësi të Vilma Nushit, Niki Gleoudi dhe Dorothea Gleoudi.
Vlera e kontratës së fituar është 32.7 milionë lekë të reja pa TVSH, ndërsa fondi limit i tenderit ishte 39.1 milionë lekë të reja pa TVSH. Sipas të dhënave, oferta fituese mbulon rreth 84% të fondit limit, një përqindje kjo që shpesh ngre flamuj të kuq për raste të paracaktimit të rezultatit.
Por, elementi më i dyshimtë i tenderit është fakti se dy kompani të tjera pjesëmarrëse kishin paraqitur oferta më të ulëta se ajo fituese. Diferenca mes ofertës fituese dhe ofertës më të lirë arrin në rreth 74 milionë lekë të vjetra. Kjo do të thotë se buxheti i shtetit ka humbur një shumë të konsiderueshme, pasi është zgjedhur një ofertë më e shtrenjtë, duke injoruar mundësinë e kursimit të parave të taksapaguesve.
Ky rast ka ngritur dyshime se Prokuroria e Përgjithshme, në vend që të jetë shembull i ligjshmërisë, dyshohet se është bërë pjesë e skemave klienteliste. Akuza të tilla dëmtojnë rëndë besimin e publikut tek institucionet e drejtësisë. Pyetja thelbësore që ngrihet është se kush do të hetojë abuzimet brenda një institucioni që ka për detyrë të hetojë pikërisht abuzime të tilla.
