Një ngjarje e rëndë ka ndodhur pas mesnate në resortin luksoz Green Coast, ku raportohet për të shtëna me armë zjarri brenda ambienteve të klubit të natës “Lolipop”.
Sipas burimeve të para, incidenti ka ndodhur rreth orës 02:50 të mëngjesit. Ende nuk ka informacion zyrtar nëse nga të shtënat ka persona të plagosur, ndërkohë që paniku ka përfshirë të pranishmit në lokal.
Forcat e Policisë së Shtetit ndodhen aktualisht në vendngjarje dhe po krehin zonën për identifikimin dhe kapjen e autorit apo autorëve të dyshuar. Zona është e rrethuar, ndërsa hyrja dhe dalja nga resorti është kufizuar për verifikime.
Ngjarja ndodh në një prej resorteve më të shtrenjta dhe të frekuentuara gjatë sezonit veror nga personazhe VIP dhe turistë të huaj, duke ngritur shqetësime serioze për sigurinë në jug të vendit./Publik
