Një shpërthim me lëndë plasëse ka ndodhur në orët e para të mëngjesit të sotëm në Tiranë. Një sasi tritoli ka shpërthyer në derën kryesore të një lokali te “Rruga e Durrësit” në pronësi të shtetasit Arbër Sinani.
Policia njofton se si pasojë e shpërthimit nuk ka persona të lënduar vetëm dëme materiale.
“Rreth orës 03:45, në Rrugën e Durrësit, në lokalin në pronësi të shtetasit A. S., dyshohet se ka plasur një sasi e vogël lënde plasëse, e vendosur pranë derës hyrëse të lokalit. Si pasojë janë shkaktuar vetëm dëme materiale. Nuk ka persona të lënduar”,- thuhet në njoftimin e Policisë.
Nuk dihet ende se kush janë autorët, sakaq në dëshminë paraprake para hetuesve pronari i lokalit ka deklaruar se nuk ka konflikte me njeri dhe nuk e di se kush mund ta ketë vendosur lëndën plasëse.
