Aksioni i Inspektoratit Kombëtar të Mbrojtjes së Territorit (IKMT) për prishjen e ndërtimeve pa leje në Parkun Kombëtar të Thethit ka hyrë në javën e dytë, mes tensioneve të ashpra me banorët dhe përplasjes me forcat e rendit.
Prej datës 8 korrik, IKMT ka nisur shembjen e ndërtimeve të identifikuara si të paligjshme, me mbështetje nga Policia e Shtetit dhe njësitë speciale FNSH. Sipas burimeve për media, deri më tani janë shembur mbi 60 struktura, nga rreth 80 të evidentuara për prishje, shumica e të cilave shërbenin si bujtina dhe objekte turistike.
Ndërhyrjet janë kryer me mjete të rënda dhe, në disa raste, me përdorimin e lëndëve plasëse për shembje, ç’ka ka ngjallur shqetësim në mesin e komunitetit vendas.
Ditën e sotme një banesë është rrethuar nga tritoli dhe pritet të shëmbet përmes një shpërthimi të telekomanduar me lëndë plasëse. Sakaq pronari i objektit ka pretenduar se ky është sipas tij një mesazh i koduar nga kryeministri Rama që “familjen tuaj ne duam ta fundosim”.
Edhe banorët e tjerë të komunitetit kanë kundërshtuar masivisht aksionin, duke bllokuar urat hyrëse dhe duke protestuar përballë forcave të policisë, madje në disa raste janë hedhur molotov ndaj mjeteve të IKMT-së dhe urave druri, por pa pasoja në njerëz.
Sakaq këtë të martë në mbështetje të banorëve të Thethit kanë shkuar dhe burrat e Mirditës. Në një prononcim për mediat ata u shprehën se ky udhëtim nuk është thjesht simbolik, por një thirrje për ndërgjegjësim kombëtar dhe veprim konkret.
Edhe pse aksioni është kundërshtuar masivisht nga banorët dhe është kritikuar gjerësisht në media autoritetet kanë deklaruar se objektet janë ndërtuar në kundërshtim me ligjin dhe përbëjnë shkelje të hapur në një zonë të mbrojtur natyrore.
Aksioni pritet të vijojë edhe në ditët në vazhdim, ndërsa situata mbetet e tensionuar. Banorët kanë paralajmëruar protesta të mëtejshme, duke kërkuar pezullimin e ndërhyrjeve dhe hapje të dialogut me qeverinë.
