Një ngjarje e hidhur ka ndodhur në Vlorë ku dy turiste ukrainase, nënë e bijë, u transportuan me urgjencë në spital pasi u rrezikuan seriozisht të mbyteshin në det në një nga plazhet e qytetit. Incidenti i rëndë ndodhi të premten, duke shokuar pushuesit dhe komunitetin lokal.
Një 44-vjeçare dhe vajza e saj 18-vjeçare, u nxorrën nga uji në gjendje kritike nga Fitim Bozheku, një mirëmbajtës i zonës së plazhit. Bozheku, i cili punonte pranë vendit të ngjarjes, ndërhyri me shpejtësi duke i nxjerrë dy gratë nga uji, duke u dhënë ndihmën e parë në vendin e ngjarjes përpara mbërritjes së shërbimeve të urgjencës.
Fatkeqësisht, pavarësisht përpjekjeve të personelit mjekësor, 44-vjeçarja ukrainase ndërroi jetë në spital. Trupi i saj do të dërgohet në morgun e Tiranës për procedurat e mëtejshme ligjore. Ndërkohë, vajza e saj 18-vjeçare ndodhet ende në intubim në repartin e reanimacionit të spitalit të Vlorës, duke luftuar për jetën.
Shefi i Reanimacionit të spitalit të Vlorës, Edmond Breshanaj, foli për mediat lidhur me gjendjen e dy turisteve. Ai konfirmoi se nëna kishte mbërritur në spital pa shenja jete dhe pavarësisht përpjekjeve, nuk ka qenë e mundur të rikthehet në jetë. Përsa i përket vajzës, Breshanaj tha se ajo ka pësuar gjendje kome, por pas ndërhyrjes së personelit mjekësor ka filluar të reagojë. Sipas tij, gjendja e 18-vjeçares tani është e qëndrueshme dhe ekzistojnë shanse reale për të mbijetuar.
“Të dyja nënë e bijë erdhën në spital rreth orës 12:00 në gjendje shumë të rëndë. Pacientja 44-vjeçare erdhi pa shenja jeta, bëmë çdo gjë por nuk arritëm ta rikthenim në jetë. Vajza 18-vjeçare edhe ajo erdhi në gjendje kome, po pas ndërhyrjes filloi të reagonte pas një ore pasi tensioni i shkoi 11. Tani gjendja e vajzës është e qëndrueshme, ka mundësi që të mbijetojë”, deklaroi Edmond Breshanaj.
Kjo ngjarje ka ngjallur shqetësim, duke rikthyer në vëmendje rëndësinë e sigurisë në plazhe dhe nevojën për prezencën e rojeve bregdetare dhe personelit të kualifikuar për ndihmën e parë, gjatë sezonit turistik.
