Florina Cani, nëna e të ndjerit Martin Cani, ka folur mbi tragjedinë, ku djali i saj humbi jetën disa muaj më parë pas një konflikti fizik në shkollën “Fan Noli” në Tiranë.
Ajo shprehu vendosmërinë për të kërkuar drejtësi për djalin e saj, duke theksuar se familja ka një avokat që po ndjek çështjen dhe kërkoi nga autoritetet të veprojnë.
“Martini ma jep forcën që të jetoj dhe unë do të këmbëngul deri në pikën e fundit që të dalë e drejta,” u shpreh ajo.
Cani denoncoi gjithashtu mungesën e reagimit nga bashkëmoshatarët dhe të njohurit e Martinit pas ngjarjes, duke theksuar se askush nuk u afrua për ta ndihmuar kur ai ishte në rrezik.
Një tjetër shqetësim i ngritur nga nëna e të ndjerit ishte mënyra se si u trajtua Martini pas incidentit. Sipas saj, ndihma e parë duhet të ishte dhënë në spitalin “Nënë Tereza”, ku ka mjekë kardiologë, dhe jo te Spitali i Traumës, ku ndihma mund të ketë ardhur me vonesë për shkak të trafikut të rënduar në Tiranë.
“Martini ma jep forcën që të jetoj dhe unë do të këmbëngul deri në pikën e fundit që të dalë e drejta. Ne kemi një avokat të familjes që po e ndjek çështjen hap pas hapi dhe ia kemi lënë në dorë t’i ndjekë avokati. Unë flas si nënë dhe bëj thirrje të mos heshtin, sepse kjo më ndodhi mua dhe mund t’i ndodhë kujtdo.
Unë mendoj se u bënë gati 5 muaj dhe unë çdo ditë e mendoj se ka një ftohje të të gjithë njerëzve dhe të bashkëmoshatarëve të Martinit, dhe nuk është afruar askush që ta ndihmojë, sepse ai ishte i prerë. Dhe në qoftë se një fëmijë e sheh të shtrirë përtokë, duhet të afrohet ta marrë. Dhe këtu ka humbur edhe sensi, mendoj unë, i njerëzillëkut.
Dhe është afruar një zonjë e nderuar, e respektuar nga ne, që ajo e ka marrë, e ka marrë me makinën e vet dhe ka shkuar te “Nënë Tereza”. Në momentin që ka shkuar te “Nënë Tereza”, e ka marrë ambulanca, dhe kjo prapë është një gabim.
Ndihma e parë duhet të ishte te “Nënë Tereza”, sepse aty ka doktorë zemre, kurse te Trauma nuk ka doktorë zemre dhe ambulanca vonon shumë, sepse trafiku në Tiranë është shumë i madh dhe korsi ambulance të veten nuk ka që të shkojë shpejt. Kështu që, po të na kishin thirrur ne si prindër, mund ta kishim çuar edhe në privat, sepse ne i kishim mundësitë që ta çonim fëmijën. Do të bënim gjithçka që ta shpëtonim.
Edhe veten e kisha ndërruar me Martinin, ia kisha dhënë unë zemrën, vetëm të jetonte”, tha Florina Cani në Syri TV.
