Komisioni Evropian është në dijeni të zhvillimeve të fundit lidhur me dekretin e miratuar nga qeveria italiane për ta kthyer qendrën e Gjadrit në Shqipëri në një qendër ndalimi dhe riatdhesimi për emigrantët, raportojnë mediat italiane.
Brukseli thotë se ky vendim është “në përputhje me ligjin evropian, pasi në qendër do të zbatohet legjislacioni italian, dhe ne po monitorojmë zbatimin e protokollit Itali-Shqipëri, duke mbajtur kontakt të vazhdueshëm”.
Kështu është shprehur një zëdhënës i Komisionit Evropian në përgjigje të pyetjeve mbi dekretin e miratuar të premten nga qeveria italiane.
“Sa i përket zgjidhjeve inovative, kemi deklaruar se jemi të gatshëm t’i shqyrtojmë ato, gjithmonë në përputhje me detyrimet e së drejtës së BE-së dhe asaj ndërkombëtare, si dhe me respektimin e të drejtave themelore,” tha Markus Lammert, zëdhënës për Çështjet e Brendshme dhe Imigracionin në Komisionin Evropian, gjatë një konference për shtyp.
Kryeministrja e Italisë, Giorgia Meloni, duke folur me një video-mesazh dërguar Samitit të Sigurisë Kufitare tha “Të luftosh imigracionin e paligjshëm do të thotë gjithashtu nxitje e imigracionit të ligjshëm dhe riafirmim i parimit se i takon çdo kombi dhe jo trafikantëve të vendosë se kush duhet dhe nuk duhet të hyjë në territorin e tij”
“Me kryeministri britanik – vazhdoi Meloni – ne gjithashtu pajtohemi se nuk duhet të kemi frikë të imagjinojmë dhe të ndërtojmë zgjidhje novatore, si ajo e nisur nga Italia me Shqipërinë. Një model i kritikuar në fillim, por që më pas ka mbledhur gjithnjë e më shumë konsensus, aq sa sot Bashkimi Evropian po propozon krijimin e qendrave të riatdhesimit në vendet e treta. Kjo do të thotë se ne patëm të drejtë”.
