Në raportin e zgjedhjeve të fundit, OSBE/ODIHR arriti në konkluzionin që shteti ishte shkrirë me partinë në pushtet, duke konkluduar se çdo aset shtetëror ishte vënë në dispozicion të partisë për të maksimizuar rezultatin zgjedhor.
Punësimet me kontrata të përkohshme janë një nga elementët më të përdorshëm për maksimalizimin e rezultatit të zgjedhjeve.
Në vitin 2024, si vit paraelektoral janë punësuar me kontrata të përkohshme pune nëpërmjet vendimit Nr.39, datë 24.1.2024 në njësitë e qeverisjes qendrore 2167 punonjës, kryesisht për një periudhë një vjeçare.
Ky vendim u pasua nga vendimi nr.164 për shtimin e 94 punonjësve të tjerë me kontrate të përkohshme pune, për një periudhë jo më shumë se 6 muaj. Pra në total në vitin 2024, janë punësuar me kontrata të përkohshme pune 2261 punonjës. Në vitin 2025, nëpërmjet vendimit Nr. 19, datë 09.01.2025 “Për përcaktimin e numrit të punonjësve me Kontratë të Përkohshme, për vitin 2025, në njësitë e qeverisjes qendrore” janë shtuar 2298 punonjës me kontrata të përkohshme pune, kryesisht për një periudhë një vjeçare.
Edhe KQZ ka kërkuar personel shtesë, duke u shtuar me 75 punonjës me kohë jo të plotë pune në mbështetje të procesit të votimit nga jashtë territorit të republikës së Shqipërisë për zgjedhjet e vitit 2025.
Pra, 2373 punonjës ose 112 punonjës më shumë se viti 2024.
Në total, në vitin 2024 si vit paraelektoral dhe 2025 si vit elektoral, janë punësuar 4.634 punonjës me kontrata të përkohshme pune. MCN
