Skandal në kompaninë One Albania. Persona të maskuar hynë në ambientet e kompanisë dhe shkatërruan kompjuterat mbrëmjen e 25 dhjetorit 2024. Ngjarja nuk u raportua dhe vetëm pas sinjalizimit të medias policia u vu në lëvizje. Kompania ONE është klientja kryesore e kompanive të Arbër Veliajt, vëllait të kryebashkiakut të Tiranës, Erion Veliaj. Sulmi mund të lidhet me tentativën për të prishur prova.
Reagimi i policisë
Nuk raportuan një ngjarje të ndodhur në dhjetor 2024, procedohen penalisht 7 punonjës të sigurisë fizike dhe drejtuesi i njërit prej departamenteve të një kompanie telefonike në Tiranë. Shërbimet e Komisariatit të Policisë Nr. 3, në bashkëpunim me strukturat hetimore të DVP Tiranë, pas marrjes së informacionit për një ngjarje të paraportuar, kryen hetime që çuan në konstatimin e kësaj ngjarjeje të ndodhur më 25 dhjetor, në ambientet e një kompanie telefonike në zonën e Laprakës.
Nga hetimet paraprake rezultoi se rreth orës 02:30 të datës 25 dhjetor, dy persona të maskuar kanë hyrë në ambientet e kompanisë duke dëmtuar drynin e derës së pasme. Ngjarja u konstatua nga punonjësi i sigurisë së brendshme G. K., i cili deklaroi se nuk ishin marrë sende dhe nuk ishin shkaktuar dëme materiale. Ai nuk njoftoi organet ligjzbatuese, por vetëm drejtuesin teknik dhe punonjësit e grupit të sigurisë fizike. Po ashtu, edhe përfaqësues të kompanisë ishin në dijeni të ngjarjes, por nuk e kallëzuan.
Në përfundim të veprimeve procedurale, Komisariati i Policisë Nr. 3 referoi materialet në Prokurori, ku filloi procedimi penal për “Moskallëzim të krimit” dhe “Veprime që pengojnë zbulimin e së vërtetës” ndaj:
2 punonjësve të sigurisë së brendshme, G. K., 50 vjeç dhe A. F., 31 vjeç;
Drejtuesit të departamentit të zyrave dhe pasurisë së kompanisë telefonike, E. S., 38 vjeç.
Po ashtu, nisi procedimi penal për “Moskallëzim të krimit” ndaj:
Drejtuesit teknik dhe 4 punonjësve të grupit të sigurisë fizike: A. Z., 54 vjeç; G. S., 40 vjeç; K. V., 63 vjeç; M. D., 55 vjeç; dhe I. T., 62 vjeç.
Hetimet, nën drejtimin e Prokurorisë, vijojnë për identifikimin e autorëve, zbardhjen e plotë të ngjarjes dhe verifikimin e përmbushjes së detyrimeve ligjore nga shoqëria private e sigurisë fizike.
