Vangjel Tavo u zgjodh në krye të Bashkisë së Himarës në gusht të vitit 2024, pasi paraardhësi i tij në detyrë, Jorgo Goro, u arrestua për abuzime me detyrën. Madje, edhe një mori zyrtarësh të tjerë në Himarë janë nën akuzë dhe hetim, teksa për një kohë të gjatë ajo bashki ka qenë “vatër” korrupsioni, me lidhje nepotike dhe klienteliste, kryesisht në dhënien e tenderëve.
Ndërkohë, megjithëse pati rotacion në krye të bashkisë, sërish dhënia e tenderëve është tejet e dyshimtë. VoxNews ka siguruar procedurën e tenderit të rrugës së Tërbaçit, ku tenderin e madh me vlerë 269 milionë lekë (2.7 milionë euro) e ka bërë Vangjel Tavo dhe zëvendësit e tij. E themi zëvendësit, pasi deri më tani Tavo ka vepruar në “mbrojtje”, ku ai është tërhequr nga vendimmarrjet e dyshimta. E nisi me grupin e pronave, ku vuri në krye Arqile Bollanon, zëvendësin e tij, i cili megjithëse është nën hetim nga SPAK-u për një pronë në Livadh, verifikon edhe pronat e tjera.
Nga ana tjetër, Tavo ka caktuar zëvendësin tjetër, Pervin Gjikuria, për të firmosur tenderët. Pervini ka firmosur edhe fituesin e tenderit të rrugës së Tërbaçit, ku nga 4 firma në garë, ai ka s’kualifikuar 3. Diferenca mes ofertës së fituesit dhe asaj më të ulët është plot 500 mijë euro. Goxha shumë, ndoshta për të kënaqur gjithkënd, pavarësisht se “me letra” të gjithë janë bërë mjeshtra. (Këto para Tavo i ka ndarë me Xhavit Ismailin. Duket se Tavo ka marrë zemër pasi Altin Dumani nuk e mori të pandehur për rolin e tij në lobimet e Ilir Metës me para të pista).
Faksimile: Njoftimi i fituesit të tenderit për ndërtimin e rrugës së fshatit Tërbaç, në Bashkinë Himarë
Sipas dokumenteve që disponon VoxNews, në datën 27 janar 2025, Bashkia e Himarës ka shpallur fituesin e tenderit me objekt “rikonstruksioni i rrugës së Fshatit Tërbaç me Rrugën Nacionale”, me një fond limit 269 milionë lekë. Në tender mori pjesë firma “METEO”, e cila ofroi 263 milionë lekë. Firma “ALBA KONSTRUKSION”, që fitoi më pas, ofroi 250 milionë lekë, ndërkohë që “G.P.G Company” ofroi 222 milionë.
Ofertën më të ulët në këtë procedurë e kishte BOE “BE-IS” & “2T” & “ERGI” ofruan 197 milionë lekë. Çuditërisht, të tria ofertat përveç ajo e fituesit, u skualifikuan.
“METEO” u skualifikua se s’kishte punë të ngjashme, “G.P.G Company” për arsye se s’kishte mjete. Ndërkohë, BOE që ofroi më pak u skualifikua për shkak se “oferta vlerësohet anomalisht e ulët kur ajo është ulur më shumë se 25% të fondit limit të përllogaritur”./PRAPASKENA
