Ceremonia funerale e Kryepeshkopit të Kishës Ortodokse të Shqipërisë, Anastas Janullatos, do të zhvillohet të enjten, më 30 janar, në Shqipëri.
Burime për mediat bëjnë me dije se trupi i pajetë i Janullatos do të vijë në vendin tonë të martën. Kryepeshkopi e kishte lënë amanet që të prehej në Shqipëri për dekadat që ka kaluar në vendin tonë, ku prej vitit 1992 është vendosur në krye të Kishës Ortodokse Autoqefale.
Gjithashtu është dhe një rregull i Kishës Autoqefale, që Kryepeshkopët të prehen në vendin ku kanë shërbyer, jo në vendin e lindjes.
Vendi se ku do të vendoset trupi i Kryepeshkopit Anastas Janullatos nuk është përcaktuar ende, por një prej mundësive që po diskutohet është Manastiri i Shën Vlashit në Durrës.
Vendimet për ceremoninë mortore të Janullatos janë marrë në mbledhjen e Sinodit të Shenjtë, e cila do të përcaktojë dhe vendin se ku ai do të prehet.
