Gjatë kontrolleve për vrasjen e Lulzim Vishës në Kamëz një ditë më parë, është gjetur një armë me silenciator në banesën e Ervis Lamit.
Lami nuk ka qenë në banesë në momentin e kontrollit, por dera është hapur nga një familjar i tij.
Ai kishte dy banesa, një ishte shtëpi druri brenda të cilës efektivët kanë parë vrima në mure të bëra me armë zjarri. Dyshohet se këto shenja mund të jenë bërë për të provuar armë të ndryshme.
Lami pritet të merret në pyetje për vrasjen e Lulzim Vishës. Ndërkohë ëhtë shpallur në kërkim edhe një 31-vjeçari.
Ervis Lami është një emër i njohur për policinë ai ka qenë bashkëpunëtor në arratisjen e 7 të dënuarve nga burgu i Drenovës më 23 nëntorit 2013, në mesin e të cilëve edhe Admir Tafili.
“Gjatë kontrollit në banesën e shtetasit E. L, në rrugën Paqësore, Zall Mner, Kamëz, shërbimet e Policisë gjetën dhe sekuestruan në cilësinë e provës materiale një armë zjarri automatike me silenciator dhe municion luftarak, 15 copë fishekë luftarak, një sopatë, një thikë, një këllëf pistolete glok dhe në oborrin e banesës janë gjetur 4 gëzhoja armë .
Në vijim të veprimeve hetimore u bë arrestimi në flagrancë i shtetasit E. L., 37 vjeç, banues në Kamëz., për veprat penale “Mbajtja pa leje dhe prodhimi i armëve, armëve shpërthyese dhe e municionit” dhe “Prodhimi, mbajtja, blerja apo shitja pa leje e armeve të ftohta”.
Po në kuadër të operacionit si rezultat i veprimeve hetimore u bë shpallja në kërkim dhe vijon puna për kapjen e shtetasit E. L., 31 vjeç.
Nga tërësia e veprimeve paraprake hetimore, administrimit të provave dhe fakteve, rezulton se banesa ku janë gjetur sendet e kundraligjshme është në posedim të shtetasit E.L dhe përdoret nga të dy shtetasi E.L 37 dhe E.L 31 vjec.
Arma e zjarrit, gëzhojat si dhe sendet e tjera të sekuestruara në banesë po dërgohen në Institutin e Policisë Shkencore për ekzaminime të mëtejshme për të parë nëse kjo armë zjarri është përdor në ngjarje kriminale”, njofton policia.
