Isuf Hasa ka pranuar autorësinë e krimit në Zall Bastar. Hasa rrëfeu se e vrau Xhemal Metën, 81 vjeç, pasi ky i fundit i ngacmonte gruan.
Hasa, 64 vjeç, rrëfeu se kishte kohë që nuk po e duronte dot Metën dhe se një natë para vrasjes kishte konsumuar kafe me viktimën. Hasa deklaron se e vrau 81-vjeçarin me një çekiç që e gjeti në oborrin e banesës së tij.
“Në mëngjes shkova në shtëpinë e Xhemalit dhe pimë kafe. Pasi mbaruam aty, vendosëm të shkonim në lokalin e fshatit.
Në oborrin e shtëpisë së tij pashë ku ishte çekiçi. E mora dhe e qëllova nga mbrapa. Kishte shumë kohë që më bullizonte dhe më ofendonte.
Kisha kuptuar që më ngacmonte gruan. Unë punoj roje nate në Dajt dhe kishte raste nuk shkoja tre netë në shtëpi.
Xhemali më merrte në telefon dhe më thoshte: “si nuk na dhe një herë nga rakia e gruas”. Kisha kohë që nuk po e duroja dot.
Pasi e vrava, i mora lekët. E dija që kishte sepse m’i kishte treguar ai vetë. Më pas kam shkuar tek stacioni elektrik dhe deri në Tiranë kam zbritur me një makinë të tyre. Më pas shkova tek shtëpia e vajzës në Vorë”, deklaroi 64-vjeçari.
