Oligarku Petrit Maho i ilaçeve dhe i tenderave të shëndetësisë mashtron shqiptarët edhe me vezët “Beata”; duke përdorur certifikata, që mendohet se janë false të BE. Që prej rënies së gripit të shpendëve, në muajt e parë të këtij viti, Petrit Maho filloi një mashtrim me shqiptarët, nëpërmjet reklamave mediatike për cilësinë e vezës “Beata”, prodhuar në pularinë ku ai është pronar. Për këtë arsye, ne kemi renditur disa nga mashtrimet e bëra prej kompanisë së tij.
Një nga reklamat në faqen e tij online
– Sipas reklamës, Petrit Maho, mashtron duke thënë se veza “Beata” prodhohet nga pula që ushqehen me produkte natyralë dominues misrin; ndërsa realisht ushqehen me 99% koncentrate importi (sipas doganës), të përzierë me përbërës kimikë, shpesh edhe me sasi që duhen groposur.
– Propagandon, sikur veza “Beata” (ish veza “Elvis”), ose siç quhet akoma “Veza e Tom Doshit”, gjoja është pranuar në tregun e BE, me vlerësimin për standarde e cilësi të nivelit “OMEGA 3”; mirëpo ky nivel në tregun e BE, është arritur vetëm nga 22 komplekse moderne pularie me aktivitet në Gjermani, Francë, Suedi, Itali, Austri, Irlandë, Norvegji, Portugali e Spanjë etj.
– Në reklamën mediatike, Petrit Maho thotë, se së shpejti do eksportojë vezën “Beata” në tregun e BE; ndërsa në faqen elektronike të firmës, deklaron se prej 1 viti po e eksporton, kur në regjistrat e doganës, nuk figuron as 1 kokërr vezë “Beata” e dalë nga Shqipëria për eksport.
– Mashtron duke deklaruar, se veza “Beata” qenka certifikuar me analiza europiane, nga laboratori modern “Noval”; kur ky laborator është në Xhafzotaj, në pronësi 100% të Petrit Mahos dhe bënë analizat për vezët e pularisë së tij.
– Ai thotë gjithashtu se laboratori i tij “Noval” është certifikuar nga BE për analiza ushqimore, kur në Shqipëri ka vetëm 2 laboratorë të akredituar për analiza prodhimesh shtazore (kafshë e shpendë): ISUV (shtetëror) dhe “Servizi Chimici Albanesi shpk” (privat).
– Mashtron konsumatorin, duke thënë se veza “Beata”, është e pajisur me certifikatë “Nr. ÇE-B”, kur BE nuk ka asnjë lloj certifikate të tillë për asnjë lloj produkti ushqimor.
Nëpërmjet kësaj reklame, importuesi i ilaçeve bëri mashtrim publik në dëm të konsumatorit, për t’i joshur që të blejnë vezët “Beata”, të prodhuara nga pula që ushqehen me koncentrate të përzierë me përbërës kimikë, shpesh edhe me sasi që duhen groposur.
E vërteta është komplet tjetër: Petrit Maho i vezës “Beata”, të krijuar nga Tom Doshi, në vitet 2014-2020, ka tentuar 13 herë për certifikimin e saj në tregun europian; por asnjë nga 11 agjencitë e BE, nuk ia ka pranuar vezët as si mostër për aplikim; për shkak të mungesës së 4 standardeve të këtij produkti.
