Drejtori i Përgjithshëm i RTSH, Alfred Peza ka dhënë dorëheqjen rreth një vit pas emërimit në këtë detyrë.
Peza e ka njoftuar dorëheqjen e tij të parevokueshme përmes një letre drejtuar Këshillit Drejtues të RTSH, dokument i cili mban datën e sotme (6 shtator, 2024).
“Të nderuar, Në zbatim të ligjit nr. 97, datë 04. 03. 2013 “Për mediat audiovizive në Republikën e Shqipërisë dhe vendimit të Kuvendit të Republikës së Shqipërisë nr. 98, datë 22. 12. 2016 “Për miratimin e statutit të RTSH”; ju paraqes dorëheqjen, në mënyrë të parevokueshme, nga pozicioni i Drejtorit të Përgjithshëm të RTSH. Duke ju falënderuar për bashkëpunimin, Me respekt Drejtori i Përgjithshëm Alfred Peza”, thuhet në letrën dorëzuar Këshillit Drejtues të RTSH-së.
Alfred Peza u zgjodh më 13 qershor 2023 si Drejtor i Përgjithshëm i Redio Televizionit Shqiptar. Ish-deputeti i Partisë Socialiste dhe gazetari Peza arriti të siguronte 9 vota nga anëtarët e Këshillit Drejtues.
Emërimi i tij u cilësua i paligjshëm nga opozita. Peza është vënë shpesh në qendër të kritikave për shkak të shkarkimeve të shumta nga detyra të personelit të RTSH-së.
Flitet se Alfred Peza mund të marrë postin e drejtorit të Përgjithshëm te një televizioni privat kombëtar.
Lexo edhe:
