Policia e Shtetit ka shoqëruar 7 persona lidhur me vrasjen e 49-vjeçarit Pëllumb Meta, trupi i të cilit u gjet i groposur në një kasolle bagëtish në banesën e tij, ndërsa ishte shpallur i humbur prej 10 ditësh.
Policia ka arrestuar vajzën e viktimës, Hygerta Metën 19 vjeç, e cila ka pohuar se është autore e krimit.
Ndërkohë sipas raportimeve, në Policinë e Durrësit janë shoqëruar 7 persona, mes të cilëve gruaja dhe dy djemtë e viktimës, 25 dhe 21 vjeç, ndërsa 19-vjeçarja është arrestuar.
Familjarët e viktimës janë marrë në pyetje lidhur me krimin, ndërsa dyshohet se ato mund të jenë pjesëmarrës në të, edhe pse hetimet vijojnë. Gjithashtu dyshohet se në krim mund të jetë përfshirë edhe një person jashtë rrethit familjar, ndërsa janë mbledhur dëshmi edhe nga banorë të zonës. Deri më tani dyshohet se krimi ka ndodhur për shkak të përplasjeve dhe sherreve brenda familjes, të paktën kjo edhe nga dëshmitë e vajzës, e dyshuar si autore e krimit.
