Merkato e verës do të jetë e zjarrtë si gjithmonë, por këtë herë do të kemi shumë lëvizje edhe në pankina. Xavi do të largohet nga Barcelona, teksa e njëjta gjë do të ndodhë me Jurgen Klopp. I cili ka lajmëruar ndarjen nga Liverpooli në fundin e sezonit.
“E dua Liverpoolin, tifozët dhe klubin. Por më kanë shteruar energjitë dhe dua të pushoj”, u shpreh Klopp gjatë momentit kur njoftoi largimin nga stoli i The Reds. Aty ku qëndron prej tetorit të vitit 2015.
Në Angli janë të sigurt për pasuesin e tij, i cili do të jetë Xabi Alonso. Spanjolli po zhvillon një punë fantastike te Bayer Leverkusen, skuadër që po e udhëheq drejt titullit të parë në histori.
Mbi të gjitha falë një futbolli shumë të bukur, që po zbavit pa masë tifozët e “Aspirinave”. Ish-mesfushori e njeh mirë Liverpoolin, pasi kaloi pesë sezone si futbollist në “Anfield” (2004-2009).
42-vjeçari është ndër trajnerët më të dalluar të brezit të tij, ndërkohë që nga ishulli raportojnë se Xabi do të jetë trajneri i ri i Liverpoolit.
Zgjedhje që miratohet edhe nga vetë Klopp. Ky i fundit gëzon një respekt të madh për Xabi Alonson., të cilin e cilëson si njeriun e duhur për të ardhmen e Liverpoolit.
