Janë pezulluar nga detyra 4 punonjës policie në doganën e Kapshticës dhe ne policinë e Korçës.
Dyshohet se ata kanë ndihmuar trafikimin e makinave të vjedhura nga Greqia duke i lejuar që të hyjnë në vendin tonë.
Gjykata a Shkallës së Parë të Juridiksionit të Përgjithshëm Korçë, ka vendosur masën e sigurisë “Arrest në burg” për shtetasin Maradona Cenolli 32 vjeç, si i dyshuar për kryerjen e veprës penale “Trafikimi i mjeteve motorike”.
AMP ekzekutoi gjithashtu vendimin e Gjykatës, për masën e sigurisë “Pezullimi i ushtrimit të një detyre a shërbimi publik”, si persona të dyshuar për kryerjen e veprës penale “Shpërdorimi i detyrës” ndaj 4 punonjësve të policisë:
– Inspektor Markelian Muarti., 32 vjeç, me detyrë punonjës policie pranë PKK Kapshticë;
– Inspektor Stelio Lushi, 56 vjeç, me detyrë punonjës policie pranë PKK Kapshticë;
– Inspektor Edison.Mielli., 35 vjeç, me detyrë punonjës policie pranë PKK Kapshticë;
– Nënkomisar Mariglen Azisllari, 28 vjeç, me detyrë Specialist për hetimin e krimeve në Komisariatin e Policisë Korçë.
Nga hetimet e kryera me metoda proaktive në lidhje me këtë procedim penal, ka rezultuar se shtetasi Maradona Cenolli ka trafikuar në Shqipëri automjete që rezutojnë të vjedhura në Greqi, duke iu bërë ndryshime në elementët identifikuese për t’i pajisur më pas me dokumente false, me qëllim shitjen në vendin tonë.
Po kështu është arritur të dokumentohet me prova e fakte ligjore se punonjësit e Policisë, në shpërdorim të detyrës dhe në kundërshtim me aktet ligjore dhe nënligjore në fuqi, si edhe në shkelje të Procedurave Standarde të Punës, nuk kanë kryer verifikime mbi dokumentacionet e mjeteve, mungesat e prokurave apo autorizimet që duhet të dispononte shtetasi Maradona Cenolli në momentin e futjes së këtyre mjeteve në territorin shqiptar.
