Drejtorët e Erion Veliajt vazhdojnë të bëjnë “planin” e abuzimeve me tenderat pavarësisht se SPAK tashmë u ka trokitur në derë. Më i zellshmi në kalendarin e këtyre punëve është drejtori i Ujësjellësit të Tiranës, Elton Kacidhja. Kur vjen fjala për vjeljen e faturave dhe taksave që lidhen me to, Kacidhja i ka gati tenderët, ndërsa kur qytetarët kërkojnë ujë të konsumueshëm dhe furnizim 24 orë, drejtori dhe kryebashkiaku mbeten tek propaganda dhe mashtrimet.
Këtë herë bashkë me drejtorin e Ujësjellës Kanalizimeve, Elton Kacidhen, Veliaj ka vënë në lojë dy tendera.
I pari, është 70 milionë lekë dhe ka objekt sistemin e faturimit të ujit ndaj qytetarëve. Bëhet fjalë për tenderin me objekt “Shpenzime për procesin e fiskalizimit për faturat”, për të cilin është lënë në dispozicion fondi me vlerë 6932677 lekë (pa TVSH).
Plani i thurur nga vartësi i Veliajt qysh netët e para të Vitit të Ri, ka ngecur, për shkak se ky tender është denoncuar në Komisionin e Prokurimeve Publike.
Sipas të dhënave të siguruara, në datë 3 janar 2024 është hapur gara nga UKT për tenderin. Afati i fundit për pranimin e ofertave që është përcaktuar nga autoriteti kontraktor është 16 janar 2024 në orën 10:00 paradite. Por, më datë 9 janar 2024 firma “Kreatx” ka bërë denoncimin, ku pretendon se kriteret e vendosura përbejnë shkelje ligjore dhe janë hartuar për një kompani të posaçme që mund të jetë paracaktuar si fitues.
“Pasi kemi analizuar me kujdes Dokumentet Standarde të Tenderit dhe kritereve të përcaktuara në njoftimin përkatës, shoqëria Kreatx sh.p.k , ka konstatuar qe DST ka kritere te vendosura nga AK ne shkelje te hapur te Ligji nr. 162/2020 Për prokurimin publik dhe VKM Nr. 285, dat 19.5.2021. Për Miratimin E Rregullave të Prokurimit Publik, duke ulur gjithë përfshirjen e operatoreve ekonomike dhe për rrjedhoje duke zvogëluar konkurrencën dhe eficencen e procedurës se prokurimit.. Për këtë arsye ne po ju drejtohemi me këtë ankese njëkohësisht SH.A Ujësjellës Kanalizime Tirane dhe Komisionit te Prokurimit Publik ne respektimi te gjitha afateve ligjore te përcaktuara nga ligjet”, thekson ankimuesi.
Pra, po dalin në dritë prapaskenat e këtij tenderi të thurur nga dyshja Veliaj-Kacidhja. Ndërkohë, ajo që bie në sy është se Firma “Kreatx” me dokumente është në pronësi të Lejdi Koçi dhe Enor Nakuçi, por pas tyre, sipas mediave, qëndron Panajot Gjiknuri, vëllai i sekretarit të PS-së, Damian Gjiknuri.
Pra, përplasja mes klaneve në PS, se kush do të rrëmbejë më parë paratë e këtij tenderi, nxjerr në shesh të palarat e drejtorit të Lali Erit.
Fill pas denoncimit të Gjiknurit, në KPP ka mbërritur edhe një tjetër denoncim këtë herë për tenderin me objekt “Përmirësimi i sistemit të faturimit dhe sigurisë, moduleve të taksave, leximeve dhe pagesave me palët e treta, mirëmbajtjen dhe monitorim i sigurisë së sistemit dhe moduleve”. Pra, një tjetër tender i mbivendoset të parit, sepse përfshin brenda edhe shërbimet e pretenduara në prokurimin “Shpenzime për procesin e fiskalizimit për faturat”.
Në tenderin e dytë me fondin limit 144.333.300 lekë publikuar nga Ujësjellësi Kanalizime Tiranë Sh. A., afati i dorëzimit të ofertave është data 5 shkurt 2024, ora 10:00.
Por, siç e shohim edhe ky prokurim ka probleme me ligjin, sepse është hartuar për të përvetësuar fondin duke shpallur fitues kompani të caktuara më parë. Firma kroate “PRIMUS ALBANIA” ka ankimuar, duke ngritur pretendimet për abuzim ndaj ligjit të “Prokurimeve Publike”. Kompania në fjalë e drejtuar nga administratori Hrvoje Cabrajic, njofton se disa prej kritereve janë të paqartë, dhe pikat brenda tyre bien në kundërshtim me njëra-tjetrën, çka sjellë penalizim dhe përjashtim diskriminues të operatorëve të interesuar. Tenderi synon që në fund qytetarët t’i paguajnë faturat online përmes bankave.
Në fakt, me sa po tregohet në këto dokumente është e qartë që Kacidhja me stafin e tij i kanë hartuar shpejt e shpejt këto tenderë dhe në të njëjtën mënyrë Veliaj iu ka dhënë aprovimin. Se pa vullnetin e kryetarit nuk lëviz asnjë lek në ndërmarrjet e Bashkisë Tiranë!
Siç e shohim abuzimet me kriteret për të lënë hapësira për korrupsion që synon fondin gjigant prej 1.5 miliard lekë.
Sipas të dhënave të Ministrisë së Financave, Ujësjellës Kanalizime Tiranë me 156 milionë lekë (të reja) borxhe dhe detyrime të prapambetura që janë të gjitha për investime të papaguara. Përse lejohet Lali Eri të bëjë super tendera kur nuk shlyen borxhet. Lali Eri ka planin B, sipas të cilit UKT do të jepet me koncesion. Përpara se të kalohet tek plani B, në nxitim e sipër se mos SPAK i merr në burg, kryebashkiaku dhe drejtori i tij po bëjnë “investime” dhe shpërdorime me lekët e arkës së shoqërisë.
