Policia e Tiranës ka ofruar 5000 euro shpërblim për këdo që ka informacion për autorin e plagosjes me armë zjarri pranë xhamisë “Xhura”.
Shtetasi Saimir Xhafa është shpallur në kërkim pasi në zonën e Varrit të Bamit ka plagosur me armë zjarri shtetasin Agim Jazaj.
Deri më tani nuk dihen motivet e kësaj ngjarjeje të rëndë. Ndërkohë 51-vjeçari Jazaj ndodhet në spital nën kujdesin e mjekëve.
Njoftimi i policisë Tiranë:
Lidhur me ngjarjen e ndodhur pak më parë, në afërsi të xhamisë “Xhura”, shërbimet e Policisë pas kryerjes së veprimeve të para hetimore, bënë të mundur identifikimin dhe shpalljen në kërkim të autorit të dyshuar të ngjarjes, shtetasit Saimir Xhafa, i ditëlindjes 04.01.1988, banues në Tiranë.
DVP Tiranë fton qytetarët që të japin informacion për autorin e kësaj ngjarjeje dhe vendos shpërblim 5000 euro, për çdo informacion të vlefshëm që do të çojë në kapjen e autorit.
Drejtoria Vendore e Policisë Tiranë vendos në dispozicion të qytetarëve, numrin e telefonit 0694111546, duke garantuar anonimatin e plotë të çdo telefonuesi.
