Policia e Durrësit ka nisur procedim penal ndaj një 56-vjeçari, pasi në subjektin që ai administron u gjetën të strehuar dhjetëra shtetas të huaj në kushte të papërshtatshme higjienike.
Specialistët për Hetimin e Trafiqeve të Paligjshme referuan materialet në Prokurori, ku nisi procedimi penal ndaj shtetasit S. M., 56 vjeç, banues në Durrës.
Sipas Policisë, në fshatin Vrrinë, në subjektin që ai ka në administrim, u gjetën të strehuar 63 shtetas të huaj të kombësive të ndryshme. Ata dyshohet se qëndronin në këto ambiente me kushte të këqija higjienike, me qëllim trafikimin dhe punësimin e paligjshëm.
Materialet procedurale i kaluan Prokurorisë për veprime të mëtejshme.
