Ministria e Mbrojtjes ka njoftuar se gjatë 24 orëve të fundit janë raportuar 28 vatra zjarri në të gjithë vendin, nga të cilat 2 vatra mbeten ende aktive. Vatrat e zjarrit janë shënuar në bashkitë e Elbasanit, Durrësit, Vlirës, Finiqit, Selenicës, Himarës, Delvinës, Skraparit, Shkodrës, Vaut të Dejës, Malësisë së Madhe, Tiranës, Kavajës, Korçës dhe Lezhës.
Aktualisht, vatrat aktive janë në vendgrumbullimin e mbetjeve në bashkinë Elbasan, ku sipas autoriteteve, po punohet intensivisht për izolimin e zjarrit me ndihmën e shërbimeve zjarrfikëse nga disa bashki dhe Forcave të Armatosura. Vatra tjetër aktive ndodhet në një sipërfaqe me shkurre dhe barishte në fshatin Grazhdan të bashkisë Finiq, ku terreni i vështirë po pengon ndërhyrjen e shpejtë, por forca zjarrfikëse dhe vullnetare janë angazhuar në fikjen e zjarrit që tashmë është përhapur edhe në një zonë me pisha në fshatin Malçan.
Në të gjitha operacionet për shuarjen e zjarreve janë angazhuar gjithsej 32 automjete zjarrfikëse dhe 255 forca operacionale. Forcat e Armatosura kanë ndihmuar gjithashtu me 2 helikopterë dhe 40 efektivë.
Bazuar në parashikimet e Institutit të Gjeoshkencave, sot pritet nivel rreziku “I LARTË” për zjarre në qarqet Shkodër, Kukës, Lezhë, Durrës, Tiranë, Berat dhe Fier, ndërsa në qarqe të tjera niveli i rrezikut vlerësohet “I MODERUAR”. Temperatura maksimale pritet të arrijë deri në 40 gradë Celsius. Ministria e Mbrojtjes fton qytetarët të tregojnë kujdes maksimal dhe përgjegjshmëri në këto ditë me temperatura të larta dhe rrezik të shtuar zjarri, duke shmangur çdo veprim që mund të shkaktojë zjarr dhe duke njoftuar menjëherë strukturat vendore në rast zjarri.
