Prokuroria e Posaçme Kundër Korrupsionit dhe Krimit të Organizuar, SPAK, ka sqaruar sot se i ka dërguar dy urdhër-thirrje kryetarit të Partisë Demokratike, Sali Berishës, në lidhje me hetimet për ngjarjet e 21 Janarit 2011, ku katër protestues u vranë. Ky njoftim zyrtar vjen pasi Berisha mohoi se kishte marrë ndonjë fletëthirrje për këtë çështje.
SPAK detajoi rrugën e urdhër-thirrjeve, duke thënë se: thirrja e parë u dërgua më 3 Nëntor 2025 në adresën e banesës, por u kthye mbrapsht me shënimin se rojet ishin autorizuar të mos merrnin asnjë zarf. Pas këtij konstatimi, Prokuroria dërgoi thirrjen e dytë më 7 Nëntor 2025 në tre destinacione: banesë, Partinë Demokratike dhe Kuvend. Megjithatë, më 9 Nëntor u refuzua marrja e zarfit në banesë, ndërsa më 12 Nëntor, stafi politik i grupit parlamentar të PD-së refuzoi marrjen në dorëzim të njoftimit në Kuvend.
SPAK sqaroi gjithashtu se njoftimi ishte dërguar edhe në adresën zyrtare të e-mail-it të Kuvendit më 10 Nëntor 2025, ndërsa theksoi se do të vijojë zbatimin e parashikimeve ligjore për njoftimin dhe paraqitjen e personit të thirrur.
I pyetur nga gazetarët mbi njoftimin e SPAK-ut gjatë një konfernce për mediat, Sali Berisha reagoi me tone të ashpra, duke i quajtur pretendimet e Prokurorisë një gënjeshtër absolute. kreu i PD mohoi kategorikisht se rojet e tij kanë refuzuar marrjen e dokumenteve, duke theksuar se këta janë njerëz të përgjegjshëm që i kanë dorëzuar çdo lloj dokumenti. Duke akuzuar SPAK-un si agjenci mashtrimi, Berisha u bëri thirrje gazetarëve të bëjnë bllok numrit të tyre sepse dezinformojnë. Ai gjithashtu mohoi marrjen e e-mail-it, duke thënë se nuk përdor e-mail në parlament dhe duke vënë në dyshim procedurat e komunikimit ligjor.
