Rreth 10 mijë banorë të Shushicës, në Elbasan, vijojnë të jenë pa energji elektrike që prej mbrëmjes së kaluar, si pasojë e motit të keq.
Ndërprerja e zgjatur e furnizimit ka lënë fshatrat e zonës në errësirë totale, duke shkaktuar vështirësi serioze në jetën e përditshme dhe në aktivitetin ekonomik.
Teksa OSHEE me në krye Enea Karakaçin tregojnë se nuk u bëhet aspak vonë për shqiptarët, mungesa e energjisë po shkakton probleme tek bizneset, veçanërisht ato ushqimore.
Banorët i bëjnë thirrje OSHEE për një zgjidhje të menjëhershme, si dhe për marrjen e masave afatgjata, pasi situata e përsëritur po ndikon drejtpërdrejt në cilësinë e jetës dhe sigurinë e komunitetit.
Kujtojmë se agjentët e Byrosë Kombëtare të Hetimit (BKH) kanë zhvilluar pak muaj më parë kontrolle në zyrën dhe banesën e Drejtorit të OSHEE, Enea Karakaçi, duke sekuestruar celularë, kompjuterë, dokumente, pajisje elektronike dhe shënime personale që i shërbejnë hetimit penal.
Operacioni u krye në kuadër të një dosjeje që përfshin korrupsion, pabarazi në tenderë, fshehje të të ardhurave nga shitja e energjisë dhe shpërdorim detyre, të kryer në bashkëpunim gjatë tre viteve të fundit në krye të OSHEE-së.
