Seanca për ish-kryeministrin Sali Berisha, për vlerësimin e dy masave të sigurisë që i janë caktuar paraprakisht nga GJKKO, do të zhvillohet të enjten.
Edhe ditën e sotme duket se ka dështuar tentativa e Gjykatës Kundër Krimit të Organizuar dhe Korrupsionit, për të zhvilluar një seancë normale, edhe pse gjyqtarja Irena Gjoka caktoi një avokat kryesisht për të mbrojtur ish-Kryeministrin.
“Me kërkesë të Prokurorisë, me qëllim garantimin e mbrojtjes efektive, Gjykata zëvendësoi av Artan Simoni me avokat tjetër nga lista e avokatëve kryesisht dhe i la kohë të njihet me aktet. Seanca do të zhvillohet në datën 26.10.2023 ora 10:00”, thuhet në njoftimin e GJKKO.
Duket se vendimi për të ndryshuar avokat ka ardhur pas reagimeve të shumta, që denonconin avokatin Artan Simoni të caktuar nga gjyqtarja Irena Gjoka, për qëndrimin që ai kishte mbajtur në rrjetet sociale, ku pretendohej se me emërtesën “bishë” i referohej ish-Kryeministrit Sali Berisha.
Megjithëse më pas u raportua se Simoni kishte fshirë nga rrjetet sociale postimin, duket se SPAK ka zgjedhur rrugën për të shuar zhurmën e krijuar, lidhur me seancën për ish-Kryeministrin Sali Berisha.
Caktimi i një avokati kryesisht nga GJKKO ka ardhur pasi dy avokatët e Berishës, Sokol Mëngjezi dhe Genc Gjokutaj, u larguan nga senaca, për shkak se GJKKO refuzoi së pari kërkesën për t’iu drejtuar Kushtetueses që të interpretonte vendimin e marrë më herët nga Gjykata, me kërkesë të SPAK, për caktimin e dy masave të sigurisë ndaj ish-Kryeministrit duke anashkaluar autorizimin nga Kuvendi.
Kërkesa e dytë, që avokatëve iu refuzua po nga GJKKO, sipas Gjokutajt, kishte të bënte me marrjen e materialeve dhe akteve në mënyrë elektronike.
Gjokutaj shpjegoi më herët se ata kishte tentuar të fusnin procesin në rrugën ligjore, duke e nxjerrë nga ngërçi ku e kishte future SPAK dhe GJKKO, me caktimin e masave kufizuese ndaj një deputeti, pa pasur autorizim nga Kuvendi.
