Një 52-vjeçar shqiptar është qëlluar për vdekje me armë zjarri. Ngjarja ka ndodhur në Itali, mbrëmjen e së dielës.
Sipas mediave italiane viktima është Vladimir Topjana, i cili u qëllua për vdekje në parkingun midis dy bizneseve tregtare. Vrasja ndodhi rreth orës 21:15 të së dielës.
Topjana po fliste me një të afërm në parkingun e makinave, përballë një lokali dhe një biznesi tjetër. Një Audi i bardhë mbërriti në atë moment dhe dy persona, po ashtu me kombësi shqiptare, kanë zbritur nga makina dhe brenda pak çastesh ka nisur konfrontimi.
Njëri prej klientëve të lokalit që ndodhej aty pranë tentoi të ulte gjakrat. Në pak sekonda u dëgjuan të shtënat e armëve. Një nga personat që doli nga makina nxori një armë dhe qëlloi dy ose tre herë, duke goditur për vdekje Vladimir Topjanën.
Menjëherë, autori ka hipur sërish në Audi dhe është larguar së bashku me bashkëpunëtorët e tij, duke humbur gjurmët.
