Policia e Durrësit ka zbardhur vrasjen e 51-vjeçarit Valbon Beqiri (i njohur edhe si Marko), i cili u gjet i pajetë në banesën e tij në lagjen nr. 12, një ditë më parë. Dy persona janë arrestuar në lidhje me këtë krim: autori i dyshuar, Teilor Tivari, 24 vjeç, dhe bashkëpunëtori i tij, Xh.D., 27 vjeç.
Sipas hetimeve të policisë, ngjarja ka ndodhur rreth orës 10:00 të paradites së 24 shtatorit. Teilor Tivari kishte shkuar në banesën ku po qëndronte Beqiri për të blerë lëndë narkotike. Gjatë këtij takimi, mes tyre ka shpërthyer një konflikt, pas të cilit i riu e ka goditur disa herë me thikë 51-vjeçarin, duke i shkaktuar vdekjen e menjëhershme.
Nga ana tjetër, në dëshminë e tij para hetuesve, Tivari ka paraqitur një version tjetër, duke pretenduar se e ka kryer vrasjen në vetëmbrojtje. Ai ka deklaruar se viktima tentoi ta përdhunonte dhe se ai e goditi me një thikë buke vetëm pasi Valbon Beqiri nuk e linte të largohej nga banesa. “Nuk e dija që do vdiste,” mësohet të ketë thënë Tivari.
Pas krimit, autori u largua me ndihmën e bashkëpunëtorit të tij, Xh.D., i cili e ndihmoi të hipte në një taksi dhe e dërgoi në banesën e tij. Gjurmët e lëna nga ata në vendngjarje dhe analizimi i kamerave të sigurisë ndihmuan policinë të identifikonte dhe arrestonte të dy personat brenda pak orësh.
Teilor Tivari akuzohet për “vrasje me dashje” dhe “mbajtje pa leje e armëve të ftohta”, ndërsa bashkëpunëtori i tij, Xh.D., akuzohet për “moskallëzim krimi” dhe “përkrahje të autorit të veprës penale”.
Trupi i viktimës u gjet në mbrëmje, rreth orës 19:00, nga nipi i tij, pasi bashkëshortja e viktimës kishte humbur kontaktet me të gjatë ditës. Banesa ku ndodhi krimi është në pronësi të kushërirës së viktimës, e cila jeton jashtë vendit, dhe ai e përdorte për të pritur miq dhe për të konsumuar lëndë narkotike.
