Vota e diasporës në zgjedhjet e 11 Majit është kthyer në mollë sherri mes kompanisë postare DHL, dhe Komisionit Qëndror të Zgjedhjeve.
Burime për mediat bëjnë me dije se për transportimin e zarfeve, DHL ka prerë fatura tatimore dhe i kërkon KQZ-së vlerën e plotë të kontratës prej 9,2 milion euro, ndërkohë që KQZ ka refuzuar t’i paguajë faturat.
Mësohet se komisioni i ka kërkuar DHL-së të sjellë faturë të veçantë për çdo shtet që ka bërë transport dhe për çdo shtet të sjellë edhe kopje elektronike të firmave të zgjedhësve që kanë tërhequr zarfet zgjedhore.
Deri më tani DHL ka sjellë firmat për një pjesë të madhe të shteteve, dhe stafi i KQZ ka filluar punën për kontrollin e nënshkrimeve. Rezulton se krahas firmave të rregullta, ka raste kur në vend të firmës është një vizë, një pikë, ose mungon fare.
Ndërkohë bëhet me dije se KQZ do të paguajë vetëm transportet e zarfeve të rregullt me firmë, dhe jo ato që nuk kanë nënshkrim fare, apo kanë shenja të tjera si vizë (_) apo pikë (.) në vend të firmës. Deri më tani thuhet se DHL nuk ka marrë asnjë pagesë.
