Marc Guiu është vetëm 17 vjeç, sot debutoi me Barcelonën në La Liga dhe i mjaftuan vetëm pak sekonda për të shënuar dhe për t’i dhuruar skuadrës së Xavit fitoren 1-0 kundër Athletic Bilbaos.
Adoleshenti i talentuar shënoi në prekjen e parë, duke zgjidhur një ndeshje tepër të komplikuar për kampionët në fuqi të Spanjës.
Barcelona mban vendin e tretë me 24 pikë, një më pak se kryesuesit e Realit të Madridit dhe Gironas. Ndërkohë që e shtuna e ardhshme (28 tetor) sjell klasiken e madhe Barcelona-Real.
Joao Felix u ndal nga traversa në minutën e dhjetë. Sulmuesi portugez gjuajti menjëherë pas pasimit të Ferran Torres, por u ndal nga traversa. Barcelona vijoi sulmet dhe iu afrua golit sërish katër minuta më vonë.
Por Unai Simon shfaqi aftësitë e tij si portier duke i mohuar golin 20-vjeçarit Fermin Lopez. Nga ana tjetër, Marc-Andre ter Stegen reagoi shumë mirë ndaj goditjes potente të Inaki Williams.
Katalanasit iu afruan golit në pjesën e dytë me Joao Felix, Fermin Lopez, teksa 16-vjeçari Yamal kishte një mundësi të artë për të shënuar përpara se të realizonte Guiu.
