Çdo verë, Shqipëria përballet me të njëjtin skenar: pyjet dhe kullotat përfshihen nga flakët, dhjetëra vatra zjarri aktivizohen njëkohësisht dhe institucionet vihen në garë me kohën për të shmangur më të keqen.
Megjithatë, zjarret nuk janë një fenomen i papritur. Temperaturat e larta, thatësira dhe rreziku i shtuar gjatë muajve të verës janë të njohura prej vitesh.
Pikërisht për këtë arsye, pyetja që shtrohet në prag të sezonit veror është: sa e përgatitur është Shqipëria për verën e vitit 2026?
Viti i kaluar, një verë me dhjetëra vatra aktive
Vera e kaluar la pas një bilanc shqetësues. Nga veriu në jug të vendit, dhjetëra vatra zjarri u përhapën në pyje, kullota dhe zona të mbrojtura natyrore.
Një nga rastet më problematike ishte zjarri pranë Syrit të Kaltër, ku flakët morën përmasa alarmante dhe iu afruan zonave të banuara.
Situata u bë veçanërisht kritike në fshatin Pecë, ku autoritetet u detyruan të evakuonin banorët për shkak të rrezikut.
Në të njëjtën kohë, zjarre të mëdha u raportuan në Delvinë, Finiq, Sarandë, Tepelenë, Polican, Kavajë, Rrogozhinë, Tiranë, Kolonjë, Kukës, Lezhë, Durrës dhe Elbasan.
Kur flakët ‘kërcënuan’ banesa dhe azile
Në disa raste, situata kaloi përtej dëmit mjedisor. Në Polican, zjarri iu afrua qytetit dhe zonës pranë azilit të të moshuarve, ndërsa në fshatra të ndryshëm u kryen evakuime emergjente për shkak të rrezikut që flakët të përfshinin banesat.
Në Kolonjë, ndërhyrja u vështirësua nga terreni i rrezikshëm pranë kufirit me Greqinë, ku raportoheshin edhe zona me prezencë minash.
Në Fushë-Arrëz, terreni i thyer pengonte ndërhyrjen e forcave tokësore.
Ndërkohë, temperaturat që arrinin deri në 40 gradë Celsius favorizonin përhapjen e shpejtë të zjarreve.
Zjarrfikësit mes heroizmit dhe mungesës së mjeteve
Nëse ka një imazh që simbolizoi verën e kaluar, ai ishte ai i zjarrfikësve që luftonin me flakët në kushte primitive.
Pamje të shpërndara nga disa zona të vendit treguan zjarrëfikësit dhe qytetarët që, përballë mungesës së mjeteve të specializuara, përpiqeshin të frenonin përhapjen e zjarrit me degë pemësh, lopata dhe mjete rrethanore.
Pamjet ngjallën reagime të forta në opinionin publik dhe ngritën pikëpyetje mbi gjendjen reale të sistemit të mbrojtjes nga zjarret në Shqipëri.
Ndërsa vendi përballet çdo vit me të njëjtin rrezik, shumë bashki vijojnë të kenë mungesa në mjete, pajisje dhe personel.
Akuzat për mungesë përgatitjeje
Deputetja e Partisë Demokratike, Ina Zhupa, akuzoi institucionet për mungesë masash parandaluese dhe reagim të vonuar.
Sipas saj, problem nuk ishte vetëm numri i zjarreve, por fakti se e njëjta situatë përsëritej vit pas viti.
Zhupa kërkoi më shumë investime në monitorim, përdorimin e dronëve, mjete moderne për ndërhyrje dhe ndëshkime më të ashpra për zjarrvënësit.
Ekspertë të fushës kanë ngritur prej kohësh të njëjtat shqetësime, duke argumentuar se Shqipëria vazhdon të investojë më shumë në ndërhyrjen pas shpërthimit të zjarrit sesa në parandalimin e tij.
Nga Niko Peleshi te Ermal Nufi
Një ndryshim i rëndësishëm institucional këtë vit lidhet me drejtimin e Ministrisë së Mbrojtjes.
Vitin e kaluar, ministria ishte nën drejtimin e Niko Peleshit. Sot, drejtimi i saj është në duart e Ermal Nufit, i cili do të përballet me testin e parë të madh të sezonit veror.
Mbetet për t’u parë nëse ndryshimi në drejtim do të shoqërohet edhe me një qasje të re në menaxhimin e zjarreve dhe emergjencave.
Çfarë pritet këtë verë?
Parashikimet meteorologjike flasin për një verë me temperatura të larta dhe periudha të gjata thatësire, faktorë që tradicionalisht rrisin rrezikun për zjarre.
Në këto kushte, vendimtare do të jenë masat parandaluese: monitorimi i zonave me risk, gatishmëria e forcave zjarrfikëse, koordinimi mes institucioneve dhe reagimi i shpejtë në momentet e para të një vatre zjarri.
Pyetja që mbetet pa përgjigje është nëse këtë herë shteti do të jetë një hap para flakëve, apo do të vazhdojë të vrapojë pas tyre.Nga Boldnews
