“S’mund të di çdo gjë! S’e kam përdorur kurrë firmën për përfitime, i trembem ligjit. Opozita, ‘gjueti shtrigash”, këto ishin disa justifikimet e kryetarit të bashkisë Tiranë, Erion Veliaj. I trembur nga hetimet e SPAK dhe nga protesta e opozitës që kërkon kokën e tij, Veliaj u mundua sot të jiqte paralele me kryeministrin Rama, që gjithashtu nuk di gjë ç’a ka bërë zëvendësi i tij.
Kryebashkiaku Erion Veliaj ka dalë sot në një komunikim për mediat dhe ka thyer heshtjen për arrestimet ish-drejtorëve të Bashkisë së Tiranës, Redi Molla, Taulant Tushe apo dhe Mariglen Qato.
Më falni! Po pse, në cilën pjesë të funksionit të tij të përcaktuar me Kushtetutë dhe dispozita ligjore, kryeministri duhet të përgjojë zëvendësin e tij apo cilindo zyrtar tjetër, me të cilin e lidh puna, kur këta të fundit e ushtrojnë influencën e postit dhe i përdorin lidhjet e tyre me X-in ose Y-in, për të përfituar në mënyrë të paligjshme?!”, ka deklaruar sot Erion Veliaj në daljen publike.
Më tej Veliaj ka tërhequr paralelen me Ramën. “Si mund të jetë kaq e padiskutueshme, që një kryeministër, apo në rastin tim, një kryetar bashkie, të jetë në dijeni të çdo gjëje që s’ka të bëjë fare me funksionin e tij të përcaktuar me ligj apo me objektivat e me një mijë e një problemet e përditshme të punës së tij?!
I ngre këto pyetje retorike sepse në asnjë vend normal demokratik, nuk ndodh kjo gjueti shtrigash. Në parlamente, ekrane, portale, madje as në rrjetet sociale të Francës, Italisë, Greqisë e me radhë, nuk i shikon këto turra drush për të djegur të gjallë Presidentë, kryeministra, kryetarë bashkish, kur drejtësia thjesht po bën punën e saj në luftën kundër korrupsionit dhe ku gjykatat, në fund, e ndajnë shapin nga shqeri, të fajshmit nga të pafajshmit”, deklaroi Veliaj. Ai dukej mjaft i tronditur. Shqet♪7simi i tij është se mos Rama dhe opozita po kërkojnë ta çojnë Veliajn me konsensus në gojën e SPAK, prandaj kërkon ndonjë sinjal nga kryeministri.
Më tutje, Veliaj ka lavdëruar punën e drejtorëve të arrestuar.
Mariglen Qato ka drejtuar IMT-në nga shtatori 2018 gjer në shtator 2023. Falë punës së tij dhe asaj skuadre është bërë i mundur Bulevardi i Ri, çlirimi i Unazës tek Astiri, lirimi i Liqenit nga zaptimet në gjysmën e tij, hapja e terreneve në Kombinat dhe 5 Maji për lagjet e reja pas tërmetit. Teksa sot ecim në ato bulevarde, buzë Liqenit, apo përgjatë Unazës së Madhe, ne kuptojmë sa punë të dobishme ishin për qytetin, por edhe sa kundërshtarë politikë u ndërzyen ndaj IMT-së sepse kishin lidhur karrierën e tyre me bllokimin e këtyre kantiereve e sabotimin e Tiranës, tha Veliaj duke i bërë CV-në vartësit të tij.
“Redi Molla ka drejtuar UKT-në në vitet 2016-2020, ku e ktheu një ndërmarrje të falimentuar në të vetmin ujësjellës me bilanc pozitiv në vend, që sot financohet direkt nga bankat ndërkombëtare të zhvillimit dhe që e ktheu Tiranën e vogël nga 7 orë ujë në ditë, ku vaditej misri e thaheshin lagjet, në një qytet 25 herë më të madh në sipërfaqe, me 20 orë ujë mesatarisht, e në shumicën e zonave urbane me 24 orë ujë.
Taulant Tusha ka drejtuar punët publike në Bashkinë e Tiranës gjer vitin e kaluar. Me një përkushtim të jashtëzakonshëm ka ndjekur 24/7 projekte që Tirana i priste prej një shekulli – nga Sheshi Skënderbej, tek Pazari i Ri, nga Bulevardi Zogu I, tek Unaza e Vogël, nga Kalaja e Tiranës në qendër, tek ajo e Petrelës në periferi, nga zgjatimi i Lanës, e gjer tek Lumi i Tiranës, që përmbyste gjithë njësitë 4, 8, 9 e 11, e gjer tek 101 kopshte e çerdhe të rinovuara, e 40 shkolla të reja, nga ‘Kosova’ e ‘Samiu’, gjer tek ‘Partizani’ e ‘Çajupi’, ku çdo ditë ulen e rriten 200 mijë fëmijë të kryeqytetit në kushte optimale”, deklaroi ndër të tjera Veliaj.
Sipas burimeve, dje SPAK i ka dërguar kryebashkiakut një fletëthirrje, prandaj sot, mes të tjerave, Veliaj përsëriti se “nuk i trembem ligjit”. “nuk kam përforur firmën për përfitime”, “gjueti shtrigash”. Kujtojmë se kreu i SPAK Dumani është shprehur se Veliaj do të pyetet në kohën e duhur për inceneratorin e Tiranës.
