Futbolli italian i thotë lamtumirë një prej drejtuesve më të njohur të dekadave të kaluara. Giuseppe “Giussi” Farina, ish-president i Milanit nga viti 1982 deri në 1986, është ndarë nga jeta në moshën 91-vjeçare. I lindur në Gambellara (provinca e Vicenzës) në vitin 1933, Farina do të mbushte 92 vjeç në shtator.
Një sipërmarrës i njohur dhe drejtues me përvojë, Farina ka lënë gjurmë jo vetëm te Milani, por edhe te Padova dhe Vicenza, ku regjistroi një sezon historik në vitin 1977-78, duke u renditur në vendin e dytë në Serinë A, suksesi më i madh në historinë e klubit. Në atë sezon, Paolo Rossi, që më pas do të shpallej kampion bote me Italinë në vitin 1982, shënoi 24 gola.
Gjatë karrierës së tij, Farina ka drejtuar gjithsej 12 klube italiane, përfshirë Milanin, Padovën, Vicenzën, Audace, Valdagnon, Legnagon, Schion, Rovigon, Bellunon, Rovereton, Modenën dhe Palù-n.
Vitet te Milani, nga rënia në B te shfaqja e Berlusconi-t
Giussi Farina mori drejtimin e Milanit më 19 janar 1982, duke zëvendësuar Gaetano Morazzoni-n. Në atë kohë, klubi po kalonte një periudhë të vështirë, me Gigi Radice në pankinë. Vetëm pak ditë pas marrjes së detyrës, Farina zgjodhi ta largonte Radicen për t’i besuar drejtimin Italo Galbiatit, por sezoni përfundoi me një tjetër rënie në Serinë B, e dyta në historinë e klubit.
Në sezonin 1982-83, Ilario Castagner e riktheu menjëherë skuadrën në elitë, por sezoni pasues ishte zhgënjyes dhe Castagner u largua. Në vitin 1984-85 u rikthye Nils Liedholm, por problemet vazhduan.
Në vitin 1986, përballë një situate të rënduar financiare, Farina jep dorëheqjen, dhe president i përkohshëm emërohet Rosario Lo Verde. Më 20 shkurt 1986, presidenti i Fininvest, Silvio Berlusconi, bleu Milanin, duke shlyer borxhet dhe duke shpëtuar klubin nga falimentimi – një akt që do të shënonte fillimin e një prej epokave më të lavdishme në historinë e futbollit evropian.
