Në një kohë kur situata energjitike në Shqipëri vijon të jetë shumë problematike, e konfirmuar kjo edhe nga shkëputjet e shpeshta të dritave këtë verë, sidomos në zonat turistike, institucionet që menaxhojnë fondet më të mëdha publike për këtë sektor jetik, vijojnë të shpenzojnë miliarda lekë, që nuk u duket aspak efikasiteti.
Në fillim të këtij Gushti, kur vëmendja e opinionit publik ishte e ndarë mes zjarreve që përfshijë vendin nga Veriu në Jug dhe pushimeve verore, Drejtoria e Tensionit të Lartë, pjesë e Operatorit të Sistemit të Shpërndarjes (OSSH), është angazhuar për t’i bërë një “dhuratë” të shtrenjtë kompanisë “Ferro Beton & Construction”.
Dhurata e majme është një tender me fond limit 599 milionë lekë të reja ose plot 6 milionë euro. Procedura është zhvilluar “urgjent”, me një afat vetëm dy-javor. Një nxitim tepër i madh, për një shumë akoma më të madhe, që ngre dyshime për mënyrën se si përdoren fondet për “emergjencat energjitike” në vend.
Tenderi 6 mln euro
Në 21 Korrik 2025, shpallet tenderi me objekt “Ndërtim i linjës 35kV N.St 220 kV Elbasan – Mjekës – Cerruje – Gramsh”.
Fondi limit për këtë tender u caktua 599.983.516 lekë të reja dhe burimi i financimit ishte nga të ardhurat e Operatorit të Sistemit të Shpërndarjes, një strukturë në varësi të Belinda Ballukut dhe e administruar nga Blendian Dalipi. Procedura tenderuese është ndjekur nga Drejtori i Tensionit të Lartë, Olsi Ngjela.
Afati për dorëzimin e ofertave nga kompanitë e interesuara ishte vetëm 14 ditë dhe gjithçka duhej të mbyllej në datën 5 gusht të këtij viti.
Dokumentat e konsultuar tregojnë se në këtë garë “urgjente” morën pjesë vetëm dy operatorë ekonomikë. Në përfundim, tenderi shkoi për “Ferro Beton & Construction Co” shpk, e cila paraqiti ofertën 587.699.112 lekë të reja. Llogaritë e shpejta tregojnë se kompania ka fituar tenderin 6 milionë euro me një ofertë vetëm 100 mijë euro më të ulët se fondi limit.
Shoqëria fituese, “Ferro Beton & Construction Co” është një kompani me objekt përpunim betoni e punime ndërtimore, e themeluar në vitin 2002. Ortaku themelues i saj ka qenë Arben Pëllumbi, aktualisht deputet në largim i Partisë Socialiste.
Pëllumbi ka qenë për disa vite aksioner kryesor i “Ferro Beton”-it, deri në largimin e tij, në vitin 2008. Shoqëria ka pasur lëvizje të aksionerëve ndër vite. Aktualisht, ajo është në pronësi të biznesmenëve Ilir Shtufi dhe Mark Luli, një dyshe që shfaqet shpesh si fitues në tenderat e fuqishëm qeveritarë, si edhe në lejet e ndryshme të ndërtimit.
