Zëdhënësja e Antikorrupsionit në Partinë Demokratike (PD), Genta Vangjeli, ka denoncuar publikisht Agjencinë Kombëtare të Shoqërisë së Informacionit (AKSHI), duke e akuzuar për shpenzime të dyshimta me vlera miliona euro në kurriz të shëndetësisë, e cila, sipas PD, ndodhet në gjendje të mjerueshme.
Denoncimi përqendrohet në mënyrën e kontraktimit, ku AKSHI ka shpenzuar 7 milionë euro me TVSH gjatë periudhës 2018-2025 vetëm për mirëmbajtjen e sistemit të informacionit shëndetësor, duke përdorur vazhdimisht procedura tenderuese të mbyllura dhe pa transparencë.
PD thekson se janë lidhur gjithsej 11 kontrata me të njëjtin operator ekonomik, duke krijuar një monopol dhe duke shkelur rëndë Ligjin e Prokurimeve Publike. Këto kontrata janë dhënë përmes negocimit pa shpallje të njoftimit të kontratës, një procedurë e lejuar vetëm në raste specifike.
- QSUT: Për Qendrën Spitalore Universitare “Nënë Tereza” (QSUT) janë lidhur 4 kontrata mirëmbajtjeje me vlerë totale 4.3 milionë euro (në vitet 2018, 2020, 2022, 2025). Gjatë kësaj periudhe, vlera e kontratave është rritur në mënyrë drastike, duke shkuar nga 800 mijë euro në vitin 2018 në 1.6 milionë euro në vitin 2025.
- Spitali i Traumës: Për Spitalin Universitar të Traumës janë lidhur 4 kontrata me vlerë totale 1.8 milionë euro (në vitet 2019, 2021, 2023, 2025). Vlera është pothuaj trefishuar, duke kaluar nga 300 mijë euro në 2019 në 888 mijë euro në vitin 2025.
- Spitali ‘Shefqet Ndroqi’: Edhe për këtë spital janë lidhur 3 kontrata me vlerë totale 517 mijë euro (në vitet 2019, 2022, 2024).
Duke pasur parasysh rritjen e vlerave të kontratave edhe pse objekti i shërbimit mbetet i njëjtë (p.sh., kostoja e mirëmbajtjes së sistemit të QSUNT shkon në 81 mijë euro në muaj me kontratën e fundit), Partia Demokratike i kërkon SPAK të nisë menjëherë hetimet dhe të japë përgjigje për këto pyetje:
- A ka respektuar AKSHI nenin 47 të Ligjit për Prokurimet Publike, duke përdorur vazhdimisht kontrata me negocim pa shpallje?
- Pse janë rritur fondet limit dhe vlerat e kontratave nga viti në vit, ndërkohë që objekti i shërbimit mbetet i njëjtë?
- Pse për 11 kontrata është përzgjedhur vetëm një operator ekonomik, duke eliminuar konkurrencën?
- A është reale kostoja e këtij shërbimi që, të paktën për QSUNT, shkon në 81 mijë euro në muaj për mirëmbajtjen e sistemit?
Genta Vangjeli bëri thirrje që paratë e qytetarëve shqiptarë të shkojnë për përmirësimin e shërbimit shëndetësor dhe për furnizimin me medikamente në Onkologjik e Pediatri, dhe jo për kontrata të dyshimta që mbushin xhepat e klientëve të pushtetit.
