Deputetja e Partisë Demokratike, Jorida Tabaku, përdori fjalën e saj në Kuvendin Kombëtar të PD-së për të përcjellë një mesazh bashkimi përtej kufijve tradicionalë partiakë, duke bërë thirrje për krijimin e një aleance të gjerë qytetare kundër sistemit që, sipas saj, ka vrarë besimin e shqiptarëve tek shteti, merita dhe e ardhmja.
Në një fjalim që u dallua më shumë për tonin bashkues sesa për retorikën e zakonshme të përplasjes politike, Tabaku argumentoi se problemi më i madh i Shqipërisë sot nuk është vetëm korrupsioni, varfëria apo emigracioni, por humbja e besimit.
“Shumë shqiptarë sot nuk besojnë se puna e ndershme shpërblehet. Nuk besojnë se mund të ecësh përpara pa njohur njeriun e duhur. Nuk besojnë se shteti punon për ta. Dhe kur nuk beson, largohesh. Ose qëndron, por e mbyll zemrën”, u shpreh ajo.
Sipas Tabakut, kjo është pasoja e një sistemi që ka krijuar privilegje për pakicën e lidhur me pushtetin, ndërsa ka lënë barrën mbi familjet, shtresën e mesme, sipërmarrësit dhe të rinjtë.
“Familjet bëjnë llogari çdo mbrëmje se çfarë të lënë pa paguar. Sipërmarrësi i ndershëm paguan taksën e korrupsionit për të mbijetuar. I riu me diplomë emigron, ndërsa promovohet ai që ka lidhjet e duhura”, tha ajo.
Megjithatë, thelbi i mesazhit të saj nuk ishte kritika ndaj qeverisë, por nevoja për të ndërtuar një shumicë të re shoqërore që shkon përtej ndarjeve politike.
Duke iu drejtuar jo vetëm demokratëve, por edhe qytetarëve të zhgënjyer, sipërmarrësve, të rinjve dhe votuesve socialistë që ndihen të tradhtuar nga premtimet e qeverisë, Tabaku tha se ndryshimi nuk mund të vijë pa bashkimin e të gjithë atyre që kërkojnë një Shqipëri më të drejtë.
“Socialistit të trishtuar dhe të dëshpëruar që sheh se si besimi i tij është keqpërdorur, dua t’i them se nuk është kundërshtari ynë. Ai është Shqipëria jonë. Nuk po i kërkojmë të ndryshojë bindjet e tij. Po i shtrijmë dorën për të punuar së bashku për një Shqipëri më të mirë”, deklaroi deputetja demokrate.
Në fjalimin e saj, Tabaku paraqiti edhe vizionin për një Shqipëri ku prona respektohet, biznesi konkurron me meritë, shtresa e mesme nuk mban barrën e sistemit dhe të rinjtë nuk e shohin emigrimin si të vetmen mundësi.
Ajo theksoi se Shqipëria nuk ka nevojë për “heronj”, por për njerëz të ndershëm në çdo nivel të shoqërisë dhe institucioneve.
Në pjesën përmbyllëse, Tabaku e vendosi Partinë Demokratike përballë një misioni më të madh se vetja, duke argumentuar se sfida e saj nuk është vetëm të përfaqësojë demokratët, por të bëhet shtëpia politike e çdo shqiptari që kërkon ndryshimin e sistemit aktual.
“Partia Demokratike ka pasur brezin që rrëzoi komunizmin. Ka pasur brezin që ndërtoi pluralizmin. Sot Shqipëria ka nevojë për brezin që rikthen besimin, bashkon njerëzit dhe e bën vendin sërish një vend ku njerëzit duan të jetojnë”, u shpreh ajo.
Mesazhi qendror i fjalës së Tabakut ishte se ndryshimi nuk do të vijë vetëm nga rotacioni politik, por nga bashkimi i të gjithë shqiptarëve që besojnë se Shqipëria mund të qeveriset ndryshe dhe se Partia Demokratike duhet të jetë instrumenti politik i këtij bashkimi.
