Kandidatja për deputete e Partisë Demokratike në listën e hapur për Tiranën, Jorida Tabaku, ka nisur ndryshe mëngjesin e saj këtë të premte, duke publikuar një foto nga një vizitë me gratë e një fasonerie në kryeqytet.
E njohur për qëndrimet e saj të forta kundër taksimit progresiv, Tabaku ka zhvilluar takime të shumta me punonjës në fasoneri, duke dëgjuar shqetësimet e tyre dhe duke propozuar zgjidhje konkrete. Ajo vijon të mbrojë taksën e sheshtë si një mekanizëm për të rritur të ardhurat reale të qytetarëve dhe për të lehtësuar barrën fiskale mbi shtresën e mesme dhe gratë që mbajnë mbi supe ekonominë familjare.
“Nuk ka si gratë e punës, që e nisin ditën herët në mëngjes, e çojnë përpara punën në shtëpi e punën në punë! Antigona dhe shumë të tjera si ajo do më kenë në krah për të folur e luftuar për to”, shkruan Tabaku në rrjetet sociale, duke e shoqëruar postimin me një foto të ngrohtë e miqësore me punonjëset e fasonerisë.
Përmes këtij angazhimi, Tabaku vijon të jetë një nga zërat më të besueshëm për gratë dhe shtresën e mesme në Shqipëri, duke ofruar një vizion ekonomik që vendos në qendër individin, punën dhe dinjitetin.
