Në spitalet e vendit mungojnë medikamentet jetësore, teksa Qeveria shkurton fondet për Shëndetësinë për t’i kaluar tek Infrastruktura, ministria e drejtuar nga Belinda Balluku dhe qindra miliona euro shkojnë tek klientët e përhershëm të Qeverisë.
Por, kjo po rrezikon jetën e qytetarëve, siç ka ndodhur dhe rasti i dy ditëve më parë në Përmet, ku 26-vjeçarja Lediana A. ra pre e pickimit helmues të një gjarëpri dhe rrezikoi prerjen e këmbës.
Vajza është dërguar fillimisht në spitalin e Përmetit dhe nga aty është nisur më pas me urgjencë drejt spitalit të Gjirokastrës, me shpresën se do t’i injektohej kundërhelmi që mungonte në Spitalin e Përmetit.
Por, u përball me një situatë skandaloze, ku antidoti mungonte edhe në spitalin e Gjirokastrës dhe e reja u dërgua me urgjencë për në Spitalin e Traumës në Tiranë, nga ku dhe iu injektua ilaçi kundërhelm.
Për fat të mirë vajzës i shpëtoi këmba, pasi do t’i ishte amputuar nëse do të vonohej edhe më, pasi helmi i gjarprit i kishte depërtuar deri në rrëzën e kofshës.
