Banorët e rrugës “Jordan Misja” në Tiranë, përballen me një situatë alarmante që nga qershori i këtij viti, pasi janë pa ujë të pijshëm. Sipas tyre, çështja ka mbetur pa zgjidhje, pavarësisht se janë bërë dhjetëra ankesa dhe thirrje te Ujësjellësi i Tiranës (UKT) me drejtues Skerdi Drenova. Përgjigjja nga ana e UKT-së ka qenë gjithmonë e njëjtë, “do e raportojmë”, por asnjëherë nuk është marrë një masë konkrete për të zgjidhur problemin.
Banorët shprehen të shqetësuar, duke theksuar se janë familje me fëmijë dhe të moshuar, dhe se është e pamundur të jetosh pa ujë, sidomos në një periudhë të nxehtë vere. Ata bëjnë me dije se që nga qershori është ardhur vetëm një herë për 10 minuta ujë, dhe më pas nuk ka ardhur më asnjë pikë uji. Sipas banorëve, për çdo kërkesë të bëre, përgjigjja ka qenë se do të raportohen problemet, por pa ndonjë ndërhyrje reale.
Banorët apeluan për publikimin e situatës, duke kërkuar ndërhyrje të menjëhershme nga bashkia me kryetaren e komanduar Anuela Ristani dhe UKT e Skerdi Drenovës për të marrë masa urgjente. Ata shprehen se jeta e tyre është bërë e paqëndrueshme dhe se nuk mund të durojnë më pa ujë në vitin 2025, në kryeqytet. Ata shpresojnë që, përmes këtij publikimi, të zgjidhet një herë e mirë kjo çështje kaq serioze.
“Ju lutem publikojeni këtë problem sepse jemi në hall! Banojmë në rrugën Jordan Misja, Tiranë, dhe që nga qershori jemi pa asnjë pikë uji. Çdo ditë marrim UKT-në në telefon, kemi bërë me dhjetëra ankesa, por përgjigjja është gjithmonë e njëjtë: “Do e raportojmë”. Kanë kaluar muaj të tërë dhe askush nuk ka ardhur të zgjidhë problemin. Jemi familje me fëmijë dhe të moshuar, është e pamundur të jetosh pa ujë në 2025 në kryeqytet! Ju lutem ta publikoni që institucionet të marrin masa urgjente, se jemi në hall. Që në qershor ka ardhur vetëm një herë për 10 minuta dhe nuk ka ardhur më asnjë pikë. I marrim në telefon ata te ujësjellësit dhe thonë: “Do e raportojmë, sepse në qershor kam ardhur tek kjo lagje dhe, sa kam kuptuar, vetëm 2-3 shtëpi s’kanë ujë.” Po, kemi bërë ankesa te ujësjellësi dhe besoj e kupton çfarë do të thotë të jesh pa ujë në gjithë këtë të nxehtë, dhe përgjigja që kam marrë është: “Po, do e rregullojmë, po askush nuk ka ardhur.” Ja ku e ke sahatin e ujit që tregon që nuk ka ujë.” – shkruan denoncuesi për JOQ.
