Një tjetër problem serioz po rëndon mbi sistemin shëndetësor në vend, duke vënë në vështirësi qindra punonjës të spitaleve publike. Prej disa javësh, mjekë, infermierë, sanitarë dhe personel administrativ raportojnë se ende nuk kanë përfituar pagën e muajit dhjetor 2025, ndonëse kanë vijuar normalisht shërbimin e tyre.
Sipas denoncimeve të mbërritura në redaksinë e Maska.al, vonesat nuk lidhen vetëm me një institucion të vetëm, por prekin disa struktura shëndetësore, përfshirë edhe Qendrën Spitalore Universitare “Nënë Tereza”, si dhe spitale në rrethe.
Punonjësit shëndetësorë shprehen të indinjuar, pasi gjatë gjithë kësaj periudhe kanë punuar pa ndërprerje, edhe gjatë festave të fundvitit, duke përballuar fluks të lartë pacientësh dhe situata emergjente. Sipas tyre, mungesa e pagesave po krijon vështirësi reale ekonomike dhe po cenon motivimin e stafit.
“Punojmë çdo ditë, por askush nuk na jep një përgjigje se pse nuk kemi marrë ende rrogën”, shprehet një punonjës shëndetësor, i cili kërkon të mbetet anonim.
Përpjekjet për të marrë sqarime nga institucionet përgjegjëse kanë rezultuar pa përgjigje. Deri më tani, nuk ka asnjë reagim zyrtar që të shpjegojë arsyet e vonesës apo afatin konkret se kur do të kalojnë pagat.
Në një sektor jetik si shëndetësia, ku barra e përgjegjësisë është e lartë dhe kushtet e punës shpeshherë të vështira, vonesa të tilla ngrejnë pikëpyetje serioze mbi menaxhimin financiar dhe respektin ndaj punonjësve që mbajnë në këmbë sistemin.
