Nga Etleva Merko
Pushimet verore janë drejt fundit dhe për shumë fëmijë, rikthimi në shkollë mund të mos jetë edhe aq i lehtë. Por me pak kujdes dhe përkushtim, mund t’i ndihmojmë fëmijët të rifitojnë motivimin dhe gëzimin për të nisur një vit të ri shkollor.
– Diskutoni me fëmijët për gjërat pozitive që i presin në shkollë.Shpjegojuni se jo gjithçka është vetëm detyra dhe rregulla. Kujtojuni se do të takojnë sërisht shokët, shoqet dhe mësuesit e tyre. Do të zhvillojnë ekskursione, orët e preferuara të artit, sportit ose aktivitete të tjera që ju pëlqejnë shumë.
– Nëse janë mësuar të flenë vonë dhe të zgjohen vonë, ka ardhur koha të nisni pak e nga pak të riktheni orarin e zakonshëm të shkollës, për ta bërë ndryshimin më të lehtë dhe më pak të mërzitshëm.
– Bëjeni përgatitjen për shkollë një përvojë të këndshme së bashku me fëmijën, zgjidhni fletoret, lapsat apo çantën e re. Kur fëmija ndjehet pjesë e këtij procesi, motivimi dhe përgjegjësia rritet natyrshëm.
– Përdorni tregime, filma apo lojëra me temë shkollore.Fëmijët mësojnë dhe motivohet shpesh përmes lojës apo tregimeve. Zgjidhni filma apo libra që e shfaqin shkollën si një vend zbavitës dhe frymëzues.
– Dëgjojini me vëmendje dhe pyetini me dashuri se çfarë u ka munguar apo çfarë nuk u ka munguar nga shkolla. Kjo i ndihmon të ndihen të dëgjuar dhe të pranuar në ndjenjat dhe mendimet e tyre.
– Vendosni së bashku objektiva të vegjël.
Qoftë “dua të lexoj më mirë” apo “dua të bëj më shumë shokë”, një qëllim i vogël i jep kuptim fillimit të vitit të ri dhe e bën atë më tërheqës.
Por mos harroni:
” Fëmijët pasqyrojnë qasjen tonë.
Nëse ne flasim për shkollën si një mundësi për rritje, zbavitje dhe zhvillim, edhe ata do ta shohin me më shumë kuriozitet dhe entuziazëm.”
Le ta bëjmë rikthimin në shkollë një aventurë të bukur dhe argëtuese.
