Nga Etleva Merko
“Shtet” që shemb të dobëtin dhe ndërton të fortin”
Një “shtet” që ligjin e zbaton në kurriz të qytetarëve të thjeshtë, ndërsa i hap rrugë investimeve “strategjike” që grabisin bregun me zaptim, metër pas metri, nga jugu në veri.
Sot, kur qytetarëve u janë marrë edhe votat, edhe besimi, edhe shpresa vjen sezoni turistik dhe bashkë me të, “ligjshmëria” selektive.
Në vend që t’u kthehet ajo pak pasuri që kanë ndërtuar me kredi, mund dhe sakrificë, u shkatërrohet me ekskavatorë, si një show force i zakonshëm për të treguar kush është “i forti i lagjes” që sot luan rolin e të fortit të Shqipërisë.
Nuk jam pro ndërtimeve pa leje.
Por po pyes: Ku ishin institucionet shtetërore kur këto ndërtime po ngriheshin ditë për ditë para zgjedhjeve? Kush mbylli sytë dhe la gjithçka të ngrihej si një votë më shumë në kuti? Pse tani, pas zgjedhjeve, ndëshkimi bie vetëm mbi të dobëtin?
Jetojmë në një vend me dy botë: një Shqipëri për “strategjikët” me pushtet dhe privilegje dhe një tjetër për qytetarët e zakonshëm që përdoren për spektakël. Ligji është vetëm një instrument selektiv për të treguar forcën mbi më të dobëtin, kurrë për të vendosur drejtësi ndaj më të fortit.
E quajnë shtet.
Ligjin që vjen pas zgjedhjeve… si ekskavator”
