Shqipëria renditet e dyta në Europë për nivelin e lartë të ekonomisë informale, me rreth 27.8% të Prodhimit të Brendshëm Bruto (GDP) që llogaritet jashtë ekonomisë së rregullt.
Sipas të dhënave, Moldavia ka një nivel më të lartë, me 37.1%, ndërsa vendet si Zvicra, Irlanda dhe Mbretëria e Bashkuar shënojnë nivele minimale, me rreth 5%.
Ekonomia informale përfshin aktivitete të papajtueshme me ligjin, si shmangia e taksave, punësimi në të zezë dhe bizneset që operojnë pa regjistrim.
Kjo ka pasoja direkte për financat publike, duke ulur të ardhurat e shtetit dhe duke kufizuar mundësitë për investime në shërbime publike si shëndetësia dhe arsimi.
Sipas një raporti të UNDP të vitit 2024, shkalla e ekonomisë informale në Shqipëri llogaritej sa 27% e totalit dhe 1/3 e punonjësve punonin “në të zezë”.
“Ekonomia e errët në Shqipëri është e madhe dhe aktiviteti ekonomik informal llogaritet të përbëjë rreth 27% të Prodhimit të Brendshëm Bruto me një të tretën e punonjësve që punojnë “në të zezë”. Në përgjithësi, merr jetë nga një mjedis institucional dhe rregullator i dobët. Informaliteti i përhapur dëmton konkurrencën, pengon alokimin efikas të burimeve shtetërore dhe private, dhe redukton të ardhurat tatimore dhe financimin mbrojtjes sociale”, citohej në raportin e UNDP.
