Partizani është kampioni i vitit 2023. Ky është bilanci që nxjerrim pas 39 ndeshjesh të luajtura në të gjithë këtë vit kalendarik, ku të kuqtë kanë zhvilluar plot 39 ndeshje dhe kanë arritur të grumbullojnë 70 pikë, më shumë se të gjithë.
Pjesën e parë të vitit skuadra e kuqe e zhvilloi nën drejtimin e italianit Kolela, që ka meritën e tij, pasi ka grumbulluar më shumë se gjysmën e pikëve. Gjithashtu, nisja pozitive e këtij edicioni, veçanërisht me Abilaliajn në krye, ka ndikuar që të kuqtë të lënë pas rivalët e Tiranës. Bardheblutë kanë arritur të grumbullojnë dy pikë më pak se të kuqtë, 68, në një ecuri mjaft të ngjashme me “demat e kuq” në sezonin e shkuar me Orges Shehin, por me një nisje aspak brenda pritshmërive të këtij edicioni.
Një tregues aspak i përshtatshëm për bardheblutë në këtë vit janë golat e pësuar, plot 47. Vetëm Laçi dhe Erzeni kanë bërë më keq sa i përket këtij treguesi. Podiumin për pikët e grumbulluara e plotëson Egnatia, me 65. Rrogozhinasit i kanë bërë nisje perfekte këtij edicioni dhe janë kandidatë potencialë për titullin.
