Shqipëria është renditur e 14-ta nga fundi në vlerësimin ndërkombëtar të arsimit PISA 2022, sipas një raporti të publikuar nga Organisation for Economic Co-operation and Development (OECD) dhe përmbledhura nga World Population Review.
Vendi ynë ka arritur një rezultat mesatar prej 368 pikësh, ndjeshëm më poshtë se mesatarja globale prej rreth 438 pikësh.
Çfarë është PISA dhe pse ka rëndësi?
Programi për Vlerësimin Ndërkombëtar të Nxënësve (PISA) është një test global që zhvillohet çdo tre vjet nga OECD, për të matur aftësitë e nxënësve 15-vjeçarë në matematikë, shkencë dhe lexim. Në PISA 2022 morën pjesë rreth 600,000 nxënës nga 85 vende, që përfaqësojnë mbi 90% të ekonomisë botërore.
Testi zgjat rreth dy orë dhe synon të masë jo njohuritë e memorizuara, por aftësitë e mendimit kritik, zgjidhjes së problemeve dhe aplikimit të dijes në situata reale. Një renditje e lartë në PISA shpesh lidhet me sisteme arsimore më efikase dhe sukses më të lartë ekonomik, ndaj vlerësimi konsiderohet si një tregues i rëndësishëm i cilësisë së arsimit në çdo vend.
Shqipëria, ende larg mesatares së OECD-së
Rezultatet e Shqipërisë tregojnë se nxënësit shqiptarë vazhdojnë të kenë vështirësi në lexim, matematikë dhe shkencë. Me 368 pikë, Shqipëria mbetet shumë poshtë vendeve të rajonit si Kroacia apo Sllovenia, që janë afër mesatares së OECD-së.
