Kryeministri Edi Rama ka reaguar në lidhje me protestën e thirrur pasditen e sotme nga opozita para Kryeministrisë.
Në postimin e tij në rrjetet sociale, Rama lëshon ofendime në drejtim të krydemokratit Sali Berishës, duke e konsideruar si “bufi stërplak”, ndërsa opozitën si një “kënetë”.
Sipas Ramës, protesta e sotme është frymëzuar nga akuzat e ish numrit 2 të Qeverisë, Arben Ahmetajt. Këtë të fundit, Rama e konsideron si një të arratisuri në kërkim nga drejtësia për korrupsion e fshehje pasurie, ndërsa akuzat e tij si broçkulla.
Postimi i Ramës:
Sot bufi stërplak i kënetës opozitare dilka bashkë me kënetën e tij në protestë dhe frymëzimi i protestës qenkan broçkullat e një të arratisuri në kërkim nga drejtësia për korrupsion e fshehje pasurie
Duhet përshëndetur kjo protestë, sepse është një pasqyrë e qartë sa s’ka e alternativës së kalbur të një kënete politike humbësish të degraduar, të cilën më 11 maj shqiptarët duhet ta çojnë drejt tharjes, duke votuar të vetmen forcë politike të denjë në Shqipëri, Partinë Socialiste të Shqipërisë
Vetëm duke e braktisur kënetën e bufit stërplak, demokratët do të krijojnë hapësirë për rilindjen e një opozite politike të denjë për Shqipërinë anëtare të Bashkimit Europian, përndryshe humbjet vetëm do të thellohen edhe përtej zgjedhjeve të 11 majit, nga ku protestuesit e sotëm do të dalin jo vetëm të humbur për të dhjetën herë radhazi, po edhe me diferencën më të thellë me Partinë Socialiste, qysh nga viti 2013
