Ish-komandanti i UÇK-së, Hysni Gucati, tha se Gjykata Speciale ka humbur besimin tek shqiptarët dhe se proceset gjyqësore të Hagës ndaj luftëtarëve të UÇK-së janë të njëanshme dhe të padrejta.
“Ne sot po protestojmë për të ngritur zërin për drejtësi. Jemi këtu për të mbrojtur luftën e shenjtë çlirimtare të Kosovës. UÇK nuk ka nevojë ta vërtetojë se ka qenë ushtri çlirimtare. Këtë e ka dëshmuar historia, populli dhe gjaku i dëshmorëve,” tha Gucati.
Ai shtoi se përmes Gjykatës Speciale po përpiqen të barazojnë viktimën me xhelatin dhe të njollosin luftën për liri:
“Sot po gjykojnë krimet në mënyrë të padrejtë. Ne nuk do ta pranojmë dhe nuk do ta lejojmë që të përdhoset historia jonë. Tirana është kryeqyteti i të gjithë shqiptarëve. Po u themi botës: Kosova ka luftuar për liri dhe çlirim. Nuk ishim kriminel. Gjykata Speciale humbi besimin tek shqiptarët. Proceset që po bëhen në Hagë janë të njëanshme dhe të padrejta. Thirrja jonë është te ndërgjegjja kombëtare,” tha Gucati.
